មីយ៉ាន់ម៉ា ពន្យារវិធានការណ៍ការពារ COVID-19 ដល់ពាក់កណ្តាលខែសីហា
- Details
- Category: International News
គណៈកម្មាធិការកណ្តាលថ្នាក់ជាតិរបស់ប្រទេសមីយ៉ាន់ម៉ា ស្តីពីការការពារ ការត្រួតពិនិត្យ និងការព្យាបាលនៅលើ COVID-១៩ បានចេញសេចក្តីជូនដំណឹងមួយកាលពីចុងសប្តាហ៏ ដើម្បីពន្យាររយៈពេលដែលមានប្រសិទ្ធិភាព សម្រាប់វិធានការណ៍បង្ការ COVID-19 ដល់ថ្ងៃទី ១៥ ខែសីហា។
ការពន្យាពេលនេះ មិនរាប់បញ្ចូលវិធានការណ៍នានា ដែលត្រូវបានលើកលែងនោះទេ។ ជាមួយគ្នានេះដែររដ្ឋាភិបាល បានដកការរឹតត្បិតលើការប្រមូលផ្តុំមនុស្សលើសពី ៥ នាក់ ទៅជាការប្រមូលផ្តុំមនុស្សលើសពី ១៥ នាក់ ដែលនឹងចូលជាធរមាននៅថ្ងៃទី ១ ខែសីហា នេះបើយោងតាមបទបញ្ជា ដែលចេញដោយក្រសួងសុខាភិបាល និងកីឡា។
នៅថ្ងៃដដែលនោះ រដ្ឋាភិបាល ក៏បានពន្យាពេលការផ្អាកប្រតិបត្តិការជើងហោះហើរដឹកអ្នកដំណើរអន្តរជាតិទាំងអស់ នៅអាកាសយានដ្ឋានអន្តរជាតិ Yangon រហូតដល់ថ្ងៃទី ៣១ ខែសីហា។
គិតត្រឹមថ្ងៃអាទិត្យ ប្រទេសមីយ៉ាន់ម៉ា មានករណីឆ្លង ជំងឺ COVID-19 ចំនួន ៣៥៣ ករណី និងមានអ្នកស្លាប់ចំនួន ៦ នាក់ នេះបើតាមការផ្សាយរបស់ស៊ិនហួរចិន កាលពីថ្ងៃអាទិត្យ។
