ឥណ្ឌូនេស៊ី នឹងផ្តល់ដូសជម្រុញជាសាធារណៈចាប់ពីថ្ងៃទី 12 ខែមករា ខណះ Omicron រីករាលដាល
- Details
- Category: International News
បើតាមរដ្ឋមន្រ្តីក្រសួងសុខាភិបាលឥណ្ឌូនេស៊ី ឲ្យដឹងកាលពីថ្ងៃចន្ទ (មករា 3) ថា ប្រទេសឥណ្ឌូណេស៊ី នឹងចាប់ផ្តើមផ្តល់វ៉ាក់សាំងដូសជម្រុញកូវីដ-19 ដល់សាធារណជនទូទៅ ចាប់ពីថ្ងៃទី 12 ខែមករាខាងមុខនេះ ដែលកាលបរិច្ឆេទនេះ ត្រូវបានសម្រេចដោយប្រធានាធិបតី។
បុគ្គលិកសុខាភិបាល ត្រូវបានផ្តល់ដូសជម្រុញនៅក្នុងខែកក្កដា ហើយផែនការឥឡូវនេះ គឺដើម្បីផ្តល់ឲ្យមនុស្សពេញវ័យទាំងអស់ ដែលបានចាក់វ៉ាក់សាំងលើកទីពីររបស់ពួកគេ ក្នុងរយៈពេលប្រាំមួយខែមុន។ ប្រជាជនប្រហែល 21 លាននាក់ នឹងត្រូវបានផ្តល់វ៉ាក់សាំងក្រោមកម្មវិធីដូសជំរុញនៅក្នុងខែនេះ។
ប្រទេសឥណ្ឌូនេស៊ី បានចាក់វ៉ាក់សាំងពេញលេញចំនួន 42 ភាគរយនៃចំនួនប្រជាជន 270 លាននាក់របស់ខ្លួន ដោយប្រើការចាក់វ៉ាក់សាំងដែលផលិតដោយក្រុមហ៊ុន Sinovac Biotechរបស់ប្រទេសចិន, Pfizer/BioNTech ឬ Moderna ។
លោករដ្ឋមន្រ្តីក្រសួងសុខាភិបាល បានប្រាប់ក្នុងសន្និសីទសារព័ត៌មានថា ប្រទេសលោក នឹងត្រូវការវ៉ាក់សាំងចំនួន 230 លានដូសសម្រាប់ដូសជំរុញ និងវ៉ាក់សាំងដែលមានស្រាប់ គឺអាចធានាបានជិតពាក់កណ្តាលនៃវ៉ាក់សាំងត្រូវការ។
គួររំលឹកផងដែរថា វ៉ារ្យ៉ង់ Omicron បានឆ្លងដល់មនុស្សជាង 150 នាក់នៅក្នុងប្រទេសឥណ្ឌូនេស៊ី ចាប់តាំងពីការរកឃើញវាកាលពីខែមុន ដែលភាគច្រើនជាអ្នកដំណើរអន្តរជាតិ នេះបើតាមការផ្សាយរបស់ CNA/Reuters កាលពីយប់ថ្ងៃចន្ទ។
