វ៉ារ្យ៉ង់ Omicron ថ្មី BA.5.2.1 ត្រូវបានរកឃើញនៅសៀងហៃ

Details

Category: International News

ទីក្រុងសៀងហៃ បានរកឃើញករណី COVID-19 ដែលពាក់ព័ន្ធនឹងវ៉រ្យ៉ងរង Omicron ថ្មី BA.5.2.1 នេះបើតាមមន្ត្រីម្នាក់ បានប្រាប់សន្និសីទសារព័ត៌មានកាលពីថ្ងៃអាទិត្យ ដែលជាសញ្ញាបង្ហាញពីការស្មុគស្មាញ ដែលប្រទេសចិនប្រឈមមុខក្នុងការរក្សាការផ្លាស់ប្តូរថ្មី ខណៈដែលខ្លួន បន្ត "គោលនយោបាយសូន្យ-កូវីដ។

អនុប្រធានគណៈកម្មការសុខភាពទីក្រុង បាននិយាយថា ករណីថ្មីនេះ ត្រូវបានរកឃើញនៅក្នុងសង្កាត់ហិរញ្ញវត្ថុនៃទីក្រុង Pudong កាលពីថ្ងៃទី 8 ខែកក្កដា គឺមានទំនាក់ទំនងជាមួយនឹងករណីមកពីក្រៅប្រទេស។

ទីក្រុងសៀងហៃ ឋិតនៅភាគខាងកើតប្រទេសចិន ទើបតែបើកទីក្រុងនៅដើមខែមិថុនា ពីការបិទខ្ទប់ដែលមានរយៈពេលប្រហែលពីរខែ ប៉ុន្តែខ្លួន បានបន្តដាក់កំហិតតឹងរ៉ឹង ដោយបិទខ្ទប់អគារ និងបរិវេណនានាភ្លាមៗ នៅពេលដែលខ្សែសង្វាក់ឆ្លងជំងឺថ្មី លេចឡើង។

អ្នកស្រុកនៅក្នុងសង្កាត់ធំៗមួយចំនួននៅទីក្រុងសៀងហៃ នឹងឆ្លងកាត់ការធ្វើតេស្ត COVID-19 ចំនួនពីរជុំ ចាប់ពីថ្ងៃទី 12 ដល់ថ្ងៃទី 14 ខែកក្កដា ក្នុងគោលបំណងគ្រប់គ្រងឲ្យបាននូវការផ្ទុះឡើងថ្មីនេះ។

សូមបញ្ជាក់ផងដែរថា វ៉ារ្យ៉ង់ Omicron BA.5 ដែលជំរុញរលកថ្មីនៃការឆ្លង COVID-19 នៅក្រៅប្រទេសនោះ ត្រូវបានរកឃើញដំបូងនៅក្នុងប្រទេសចិន កាលពីថ្ងៃទី 13 ខែឧសភា លើអ្នកជំងឺបុរសអាយុ 37 ឆ្នាំ ដែលបានធ្វើដំណើរមកកាន់ទីក្រុងសៀងហៃ ពីប្រទេសអ៊ូហ្គង់ដា នេះបើយោងតាមមជ្ឈមណ្ឌលចិនសម្រាប់ការការពារ និងគ្រប់គ្រងជំងឺ។

វ៉ារ្យ៉ង់ BA.5 មានអត្រាឆ្លងលឿនជាងមុន និងសមត្ថភាពគេចចេញពីប្រព័ន្ធភាពស៊ាំ កាន់តែប្រសើរឡើង។ ប៉ុន្តែការចាក់វ៉ាក់សាំង នៅតែមានប្រសិទ្ធភាពក្នុងការការពារវ៉ារ្យ៉ង់ BA.5 ពីការបង្កជំងឺធ្ងន់ធ្ងរ ឬស្លាប់បាន នេះបើតាមការផ្សាយរបស់ Reuters កាលពីយប់ថ្ងៃអាទិត្យ។