អ្នកនាំពាក្យក្រសួងអប់រំ ៖ លទ្ធផលប្រឡងឌីប្លូមនឹងដឹងក្រោយថ្ងៃ១៤ ធ្នូនេះ
- Details
- Category: National News
រាជធានីភ្នំពេញ ៖ លោក រស់ សុវាចា អ្នកនាំពាក្យក្រសួងអប់រំ យុវជន និងកីឡា បានបញ្ជាក់លទ្ធប្រឡងសញ្ញាបត្របឋមសិក្សាបឋមភូមិ នឹងដឹងជា ផ្លូវការថា ជាប់ប៉ុន្មានភាគរយ និងធ្លាក់ប៉ុន្មានភាគរយ នៅក្រោយថ្ងៃទី១៤ ធ្នូ ឆ្នាំ២០២០ ។
លោកបញ្ជាក់ថា«ការចេញលទ្ធការប្រឡងឌីប្លូមមិនមានចេញទម្រង់ដូចលទ្ធបាក់ឌុបទេ ។មានន័យថា យើងចេញប្រឡងបាក់ឌុបចេញជារួមនៅក្នុងពេលតែមួយបាន ប៉ុន្តែការប្រឡងឌីប្លូមចេញនៅថ្ងៃ៧ ធ្នូ នៅកម្រិតសាលារៀនទាំងអស់បង្ហាញសិស្ស ។
ក៏ប៉ុន្តែក្រសួងមិនទាន់មានលទ្ធផលរួមទេ គឺបានស្នើសាលារៀនទាំងអស់ផ្ញើរបាយការណ៍មកក្រសួងត្រឹមថ្ងៃ១៤ធ្នូ» ។
លោកបានគូសបញ្ជាក់ ការប្រឡងឌីប្លូម គឺការប្រឡងនៅត្រឹមកម្រិតតាមសាលារៀនមិនដូចបាក់ឌុបដែលជាប្រឡងថ្នាក់ជាតិនោះទេ ។
លោកក៏បានឲ្យដឹងថា គ្រឹះស្ថានសិក្សាជាអ្នករៀបចំគ្រប់ដំណាក់កាលនៃការប្រឡងឌីប្លូមដូចឆ្នាំមុនដែរ ក្រោមកិច្ចសហការជាមួយក្រសួងអប់រំ យុវជន និងកីឡា និងមន្ទីរអប់រំ យុវជន និងកីឡា ទាំង២៥ខេត្ត-រាជធានី តាមការចាំបាច់ ។
ការប្រឡងឌីប្លូមសម័យប្រឡង ៣០ វិច្ឆិកា ២០២០ បានប្រព្រឹត្តទៅនៅតាមគ្រឹះស្ថានសិក្សាផ្ទាល់តាម២៥ខេត្ត-រាជធានី ដោយមានបេក្ខជនប្រឡងសរុបចំនួន ១៥៨,៧១៧នាក់ (នារី ៨៥,១៣១នាក់) និងមានមណ្ឌលប្រឡងចំនួន ១,៧២៩ ស្នើនឹង ៧,១៤១ បន្ទប់ប្រឡង ។
ទោះបីជាយ៉ាងណាក្តីអ្នកនាំពាក្យក្រសួងបានអះអាងថា លទ្ធផលមិនដឹងជាប់ប៉ុន្មានភាគរយ និងធ្លាក់ប៉ុន្មានភាគរយនោះទេ ព្រោះខាងសាលារៀនមិនទាន់ផ្ញើរបាយការណ៍នៃចំនួនសិស្សប្រជាប់ និងធ្លាក់ទៅកាន់ក្រសួងនោះទេ ៕
ដកស្រង់ពី៖ កោះសន្តិភាព