ប្រឡងបាក់ឌុបត្រូវពន្យារពេលដោយសារតែកូវីដ១៩ រហូតដល់ខែមករា
- Details
- Category: National News
រាជធានីភ្នំពេញ ៖ ដោយសារតែការរកឃើញករណីឆ្លងជាបន្តបន្ទាប់នៃព្រឹត្តិការណ៍សហគមន៍ ២៨ វិច្ឆិកា នារសៀលថ្ងៃទី ០៧ ខែធ្នូនេះ ក្រសួងអប់រំ យុវជន និងកីឡាបានប្រកាសសម្រេចពន្យារពេលនៃការប្រឡងសញ្ញាបត្រមធ្យមសិក្សាទុតិយភូមិ (ប្រឡងបាក់ឌុប) ដែលគ្រោងរៀបចំនៅថ្ងៃទី២១-២២ ខែធ្នូ ឆ្នាំ២០២០ ទៅដល់ពាក់កណ្ដាលខែមករា ឆ្នាំ២០២១វិញ ។
យោងតាមសេចក្ដីជូនដំណឹងរបស់ក្រសួងអប់រំ យុវជន និងកីឡា បានបញ្ជាក់ថា សម្រាប់កាលបរិច្ឆេទច្បាស់លាស់ នៃការប្រឡង ក្រសួងនឹងជូនដំណឹងនៅពេលក្រោយ។
ដែលការសម្រេចចិត្តពន្យាពេលការប្រឡងបាក់ឌុង ដោយសារកម្ពុជាផ្ទុះឡើងនូវជំងឺកូវីដ-១៩ នៅក្នុងសហគមន៍ ជាធ្វើឲ្យមានអ្នកឆ្លងជាបន្ដបន្ទាប់ ដែលគិតមកដល់ថ្ងៃនេះគឺមានអ្នកឆ្លងក្នុងសហគមន៍ដល់ទៅ ៣២ នាក់ត្រឹមព្រឹកថ្ងៃទី ០៧ខែធ្នូ នេះ ។
គួររំឮកថា កាលពីពេលកន្លងអ្នកនាំពាក្យក្រសួងអប់រំយុវជន និងកីឡាបានឲ្យដឹងថា សម្រាប់បេក្ខជន ដែលបានចុះឈ្មោះប្រឡងសញ្ញាបត្រមធ្យមសិក្សាទុតិយភូមិ ឬបាក់ឌុប ក្នុងឆ្នាំ២០២០នេះ គឺមានជាង១២ម៉ឺននាក់ដែលនឹងចូលរួមប្រឡងនៅថ្ងៃទី២១ ខែធ្នូ ខាងមុខនេះ ។
ដកស្រង់ពី៖ កោះសន្តិភាព