សម្តេចតេជោ បញ្ជាឲ្យបើកយុទ្ធនាចាក់វ៉ាក់សាំងជូនប្រជាពលរដ្ឋនៅតំបន់ក្រហម
- Details
- Category: National News
រាជធានីភ្នំពេញ ៖ សម្តេចតេជោ ហ៊ុនសែន នាយករដ្ឋមន្ត្រីបានដាក់បញ្ជាឲ្យបើកយុទ្ធនាការចាក់វ៉ាក់សាំងការពារជំងឺកូវីដ១៩ នៅតំបន់ក្រហមនារាជធានីភ្នំពេញ និងទីក្រុងតាខ្មៅ ដែលជាតំបន់បិទខ្ទប់ ។
យោងតាមសារសម្លេងរបស់តេជោ ហ៊ុនសែន នាព្រឹកថ្ងៃទី២៨ ខែមេសា ឆ្នាំ២០២១ បានលើកឡើងថា បានបញ្ជាដោយប្រើកំលាំងកងព័ទ្ធធ្វើយុទ្ធនាការចាក់វ៉ាក់សាំងជូនប្រជាពលរដ្ឋដែលរស់នៅក្នុងតំបន់ក្រហម ចាប់ពីអាយុ១៨ឆ្នាំឡើងទៅទាំងអស់ ។ សម្តេចបញ្ជាក់ថា ៖«ស្អែកនេះវ៉ាក់សាំងយើងនឹងមកបន្តទៀត អីចឹងទេ យើងបុកផ្តាច់ចាក់លើប្រជាជន និងកម្មករ ។
អីញ្ចឹងយើងមានវ៉ាក់សាំងជាង១លានដូស ដូច្នេះចាក់បានប្រហែលជា៥០ម៉ឺននាក់ ។ យើងត្រូវចាក់វ៉ាក់សាំងនៅភ្នំពេញ និងខេត្តកណ្តាលចំនួនជាង៣លាននាក់ ដែលស្មើនឹង៦លានដូស ។
អីញ្ចឹងកំលាំងកងទ័ពត្រូវប្រមូលផ្តុំមកទាំងអស់» ។ សម្តេចក៏បានលើកឡើងថា ការចាក់វ៉ាក់សាំងនេះធ្វើយ៉ាងណាចៀសវាងកុំប្រជាជនចេញពីតំបន់ក្រហមមកចាក់នៅខាងក្រៅ គឺត្រូវចូលទៅចាក់ក្នុងទីតាំងដែលជាតំបន់ក្រហមនោះតែម្តង ។
សម្តេចក៏បានលើកឡើងថា ការចាក់វ៉ាក់សាំងនេះ កុំចាំគិតថា ប្រជាជនមកពីខាងណាទេ គឺឲ្យតែយល់ព្រមចាក់គឺចាក់ឲ្យតែម្តង ហើយចេញកាតឲ្យគាត់ ។
សម្តេចក៏បានលើកឡើងថា ចាក់វ៉ាក់សាំងនេះត្រូវវៀបចំសណ្តាប់ធ្នាប់ឲ្យបានល្អ ដោយអាជ្ញាធរមូលដ្ឋានត្រូវកំណត់ថ្ងៃចាក់នៅភូមិនេះ ឬភូមិនោះ។ សម្តេចថា ៖«យើងត្រូវបើយុទ្ធនាការថ្នាក់ជាតិដោយយកកំលាំងកងទ័ពចេញតែម្តង ។
យើងចាក់ដូសទី១ អាចចាប់ផ្តើមមុនថ្ងៃទី៥ ខែឧសភា ក៏បានឲ្យរៀបចំរួចរាល់ហើយ ។ និយាយរួមឲ្យតែងអាយុ១៨ឆ្នាំឡើងទៅ គឺចាក់ឲ្យតែម្តងរាប់ទាំងជនបរទេស »៕
ដកស្រង់ពី៖ កោះសន្តិភាព