សុបិន្ដក្លាយជាការពិតហើយ! ពេជ្រ ចរណៃ ទើបបើកដំណើរការសាលាគុនល្បុក្កតោខ្មែរ
- Details
- Category: Other News
តារាសម្ដែងស្រី អ៊ិត កន្និកា ហៅពេជ្រ ចរណៃ ចាប់ផ្ដើមដំណើរការសាលាគុនល្បុក្កតោឈ្មោះ"ជ័យ តេជៈ" របស់ខ្លួនហើយ បន្ទាប់ពីបណ្ឌិតសភាគុនល្បុក្កតោកម្ពុជា ចេញវិញ្ញាប័នប័ត្រទទួលស្គាល់ការចុះឈ្មោះបើកសាលាគុនដែលនាងជាប្រធាន។
កញ្ញា ពេជ្រ ចរណៃ ដែលបច្ចុប្បន្នកំពុងមមាញឹកនឹងការថតរឿងផង និងបង្ហាត់ក្បាច់គុនល្បុក្កតោដល់ពលទាហាននៅអង្គភាពយោធាមួយ ឥឡូវនេះនាងបានហក់ទៅបើកសាលាគុនផ្ទាល់ខ្លួន។ មុនការបើកនេះ នាងក៏ធ្លាប់បង្ហើបប្រាប់Sabay ដែរថា នាងនឹងបើកសាលាគុនផ្ទាល់ខ្លួនមួយ ដើម្បីចូលរួមអភិវឌ្ឍ អភិរក្ស បណ្ដុះបណ្ដាល និងផ្សព្វផ្សាយឲ្យបានកាន់តែទូលំទូលាយនូវក្បាច់គុនល្បុក្កតោខ្មែរ។
តារាសម្ដែងរូបស្រស់សោភា មានទេពកោសល្យខាងក្បាច់គុនបុរាណខ្មែររូបនេះ ថ្លែងតាមបណ្ដាញសង្គមហ្វេសប៊ុកម្សិលមិញថា ក្នុងនាមកញ្ញាជាប្រធានសាលាគុន និងបុគ្គលិកប្រតិបត្ដិទាំងអស់សូមថ្លែងអំណរគុណដល់ឯកឧត្ដម សាន គឹមស៊ាន ប្រធានបណ្ឌិតសភាគុនល្បុក្កតោកម្ពុជាដែលបានផ្ដល់វិញ្ញាបនបត្រទទួលស្គាល់សាលារបស់នាង។
សូមបញ្ជាក់ថា សាលាគុនល្បុក្កតោ"ជ័យ តេជៈ" ដែលតារាសម្ដែង អ៊ិត កន្និកា ទើបបើកដំណើរការនេះ ស្ថិតនៅដីឡូត៍លេង២៦០៨ ភូមិគោកឃ្លាង សង្កាត់ភ្នំពេញថ្មី ខណ្ឌសែនសុខ រាជធានីភ្នំពេញ៕
ដកស្រង់ពី៖ Sabay