ដឹងហើយ! ឡានអគ្គិសនីទីមួយរបស់ Toyota សាកពេញម្តងជិះពីភ្នំពេញ ដល់ អង្គរវត្ត
- Details
- Category: Other News
ក្រុមហ៊ុន Toyota នឹងបញ្ចេញរថយន្តអគ្គិសនីទីមួយរបស់ខ្លួនម៉ូដែល BZ4x Crossover នៅអំឡុងពាក់កណ្តាលឆ្នាំ២០២២។ ប៉ុន្តែទន្ទឹមនឹងនោះ Toyota ក៏ទើបតែបង្ហាញ Spec សំខាន់ៗបន្ថែមទៀតអំពីរថយន្តនេះ ដូចជាទំហំអាគុយ កម្លាំងម៉ាស៊ីន និងបច្ចេកវិទ្យាថ្មីដែលបំពាក់ក្នុងរថយន្ត ជាពិសេសដៃចង្កូតដែលមានការឌីហ្សាញគួរឱ្យទាក់ទាញ។
រថយន្ត BZ4x មានទំហំប្រហែលនឹង Toyota RAV4 ស៊េរីឆ្នាំ២០២១ ដែរ ប៉ុន្តែមានការឌីហ្សាញខុសគ្នាដោយ BZ4x មានរាងស្អាតទំនើបជាង និងមានគម្លាតពីកង់មុខទៅកង់ក្រោយ វែងជាងបន្តិច។
វាត្រូវបានផលិតឡើងក្នុងទម្រង់ជារថយន្តអគ្គិសនី e-TNGA ដែល Toyota បានអភិវឌ្ឍជាមួយក្រុមហ៊ុន Subaru ពោលគឺដូចនឹងរថយន្ត Subaru Solterra ដែរ។រថយន្តអគ្គិសនីដំបូងរបស់ Toyota នេះ ប្រើប្រាស់អាគុយប្រភេទ lithium-ion ផ្ទុកភ្លើងបាន ៦៤គីឡូវ៉ាត់ម៉ោង និងមានម៉ូទ័រ១ កម្លាំង ២០១សេះ ប៉ុង១ រត់កង់ខាងមុខ។
វាក៏មានជម្រើសម៉ូទ័រ២ កម្លាំង ២១៥សេះ ប៉ុង២ ដោយអាចជាន់ពីល្បឿន ០ ដល់ ១០០គីឡូម៉ែត្រ/ម៉ោង ប្រើពេល ៧,៧វិនាទី។បើផ្អែកតាមការអះអាងរបស់ Toyota បង្ហាញថា ក្នុងពេលសាកពេញម្តង រថយន្តអគ្គិសនីនេះ អាចបើកដល់ចម្ងាយ ៣៧០គីឡូម៉ែត្រ (សម្រាប់ប៉ុង១) និង ៣២០គីឡូម៉ែត្រ (សម្រាប់ប៉ុង២) (បើគិតពីភ្នំពេញ ដល់ប្រាសាទអង្គរវត្ត មានចម្ងាយ ៣២១គីឡូម៉ែត្រ)។
វាក៏ភ្ជាប់មកជាមួយឆ្នាំងសាកលឿន ដែលសាកពី ០ ដល់ ៨០ភាគរយ ចំណាយពេល ៣០នាទី។ ចំណែកដំបូលសូឡា នឹងទទួលបានថាមពលពេញ ពេលបើកបានដល់ចម្ងាយជាង ១៦០០គីឡូម៉ែត្រ។
មកមើលផ្នែកកាប៊ីនរថយន្ត ពិសេសត្រង់ដៃចង្កូតត្រូវបានឌីហ្សាញជារាងនឹម ស្រដៀងនឹងរថយន្ត Tesla Model S និង X ស៊េរីថ្មីដែរ ដោយវាអាចបង្វិលបាន ១៥០ដឺក្រេ។
ឯប្រព័ន្ធកម្សាន្តវិញ គេមិនដឹងថាវាមានទំហំអេក្រង់ប៉ុនណាទេ ប៉ុន្តែអាចប្រើមុខងារ voice control និងបំពាក់កុងទ័រឌីជីថល។ យ៉ាងណាមិញ Toyota បញ្ជាក់ថា ខ្លួននឹងធ្វើការអាប់ដែតប្រព័ន្ធ និងមុខងារក្នុងរថយន្តនេះ ឱ្យកាន់តែប្រសើរបន្ថែមទៀត៕
ដកស្រង់ពី៖sabay