លោកស្រី Liz Truss នឹងក្លាយជានាយករដ្ឋមន្ត្រីថ្មីរបស់ចក្រភពអង់គ្លេស បន្ទាប់ពីឈ្នះ ការប្រកួតប្រជែងគណបក្សអភិរក្ស
- សេចក្ដីលម្អិត
- ជំពូក៖ ព័ត៌មានអន្តរជាតិ
លោកស្រី Liz Truss នឹងក្លាយជានាយករដ្ឋមន្ត្រីថ្មីរបស់ចក្រភពអង់គ្លេស បន្ទាប់ពីយកឈ្នះលើលោក Rishi Sunak ក្នុងការប្រកួតប្រជែងថ្នាក់ដឹកនាំគណបក្សអភិរក្ស។
លោកស្រី Truss ដែលបានយកឈ្នះការប្រកួតប្រជែងនេះ នឹងបន្តតំណែងលោក Boris Johnson នៅថ្ងៃអង្គារនេះ ដោយក្លាយជាមេដឹកនាំស្ត្រីទីបីរបស់ប្រទេស។
រដ្ឋមន្ត្រីការបរទេសរូបនេះ បានប្រើសុន្ទរកថាជ័យជំនះរបស់លោកស្រី ដើម្បីបង្ហាញថា លោកស្រី នឹងមិនបង្កឱ្យមានការបោះឆ្នោតសកលមុនកាលកំណត់នោះទេ ជំនួសមកវិញដោយសន្យាថា នឹងទទួលបាន «ជ័យជម្នះដ៏អស្ចារ្យសម្រាប់គណបក្សអភិរក្សនៅឆ្នាំ២០២៤»។
សូមបញ្ជាក់ថា លោក Johnson ដែលត្រូវបានបង្ខំឱ្យលាលែងពីតំណែង បន្ទាប់ពីរដ្ឋមន្ត្រីជាច្រើនរូប បានចាកចេញពីរដ្ឋាភិបាលនោះ នឹងផ្តល់ការលាលែងពីតំណែងជាផ្លូវការ ដោយចូលគាល់ព្រះមហាក្សត្រីនៅប្រាសាទ Balmoral នៅថ្ងៃអង្គារ នេះបើតាមការផ្សាយរបស់សារព័ត៌មាន Skynews ។