កាកបាទក្រហមកម្ពុជា ចុះសួរសុខទុក្ខមន្ត្រីនគរបាលដែលរងគ្រោះថ្នាក់ចរាចរណ៍ក្នុងពេលចុះបង្ក្រាបបទល្មើស
- សេចក្ដីលម្អិត
- ជំពូក៖ ព័ត៌មានជាតិ
(ភ្នំពេញ)៖ នៅរសៀលថ្ងៃអង្គារ ១០កើត ខែស្រាពណ៍ ឆ្នាំច សំរឹទ្ធិស័ក ព.ស.២៥៦២ ត្រូវនឹងថ្ងៃទី ២១ ខែសីហា ឆ្នាំ២០១៨ នេះ កាកបាទក្រហមកម្ពុជា (កក្រក) ដែលមាន សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ជាប្រធាន បានផ្តល់ស្បៀង សម្ភារ និងថវិកាមួយចំនួន ក្នុងពេលចុះសួរសុខទុក្ខ លោកព្រឹន្ទបាលទោ ផាន់ ភូមិន្ទ អាយុ ២៣ឆ្នាំ មន្ត្រីនគរបាលសង្កាត់ ប៉ុស្តិ៍ចោមចៅទី ៣ ដែលបានរងគ្រោះថ្នាក់ចរាចរណ៍ បណ្តាលឱ្យបាក់ឆ្អឹងដងកាំបិតខាងស្តាំ ខណៈពេល កំពុងប្រតិបត្តិការបង្ក្រាប បទល្មើសចោរឆក់ កាលពីយប់ថ្ងៃទី ១៩ ខែសីហា ឆ្នាំ២០១៨ ក្នុងភូមិសាស្ត្រខណ្ឌពោធិ៍សែនជ័យ រាជធានីភ្នំពេញ។
នៅពេលចុះទៅសួរសុខទុក្ខនោះ លោកស្រី ម៉ែន នារីសោភ័គ អគ្គលេខាធិការរងទី ១ កក្រក បានពាំនាំប្រសាសន៍របស់ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ផ្តាំផ្ញើសួរសុខ ទុក្ខចំពោះលោក ផាន់ ភូមិន្ទ ដែលបានរងគ្រោះថ្នាក់នៅ ក្នុងឧបទ្ទវហេតុខាង លើនេះ និងសូមផ្តាំផ្ញើឲ្យ ថែទាំសុខភាព ព្យាបាលមុខរបួសឱ្យបានល្អ ឆាប់បានជាសះស្បើយ វិលត្រឡប់ទៅបំពេញ ការងារបម្រើប្រ ជាពលរដ្ឋវិញ ។
បន្ទាប់ពីទទួលបានការ ឧបត្ថម្ភពីកាកបាទក្រហមកម្ពុជា នូវគ្រឿងឧបភោគ បរិភោគ និងថវិកាមួយចំនួនរួចមក លោក ផាន់ ភូមិន្ទ បានថ្លែងអំណរគុណ យ៉ាងជ្រាលជ្រៅចំពោះ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ដែលតែងតែយកចិត្តទុកដាក់ គិតគូរ និងលើកទឹកចិត្តដល់ ជនរងគ្រោះគ្រប់ប្រភេទ ដោយគ្មានការរើស អើងអ្វីឡើយ។
ឆ្លៀតក្នុងឱកាសនោះដែរ លោកស្រីអគ្គលេខាធិការរងទី ១ ក៏បានចុះទៅ សួរសុខទុក្ខ និងផ្តល់អំណោយជូនដល់ លោកអនុសេនីយ៍ទោ សែត គឹមសេម អាយុ ៤១ឆ្នាំ មន្ត្រីនគរបាលសង្កាត់ ប៉ុស្តិ៍ចោមចៅទី ៣ ដែលកំពុងមានជំងឺទឹក នោមផ្អែមធ្ងន់ធ្ងរផងដែរ៕
ដកស្រង់ពី៖ Fresh News