បុរស២នាក់ស្រឡាញ់ស្ត្រីមេម៉ាយម្នាក់ ប្រែក្លាយជាជម្លោះស្នេហា
- សេចក្ដីលម្អិត
- ជំពូក៖ ព័ត៌មានសន្តិសុខសង្គម
ខេត្តសៀមរាប ៖ បុរស២នាក់ ម្នាក់រងគ្រោះចូលមន្ទីរពេទ្យ និងម្នាក់ទៀតក្លាយជាអ្នកទោស ព្រោះតែជាជនដៃដល់ ។ រឿងរ៉ាវរបស់អ្នកទាំង២ គឺផ្ដើមចេញពីការស្រឡាញ់ស្ត្រីមេម៉ាយម្នាក់ ហើយបានមកលេងផ្ទះស្ត្រីមេម៉ាយដោយចៃដន្យ ទាំង២នាក់ក៏បបួលគ្នាផឹកស៊ី ។
ដោយសារតែឃើញគូប្រជែងនៅក្មេងជាង ឈ្មោះ ឈឿម ឆេន អាយុ៤៣ឆ្នាំក៏ឆក់ឱកាស ឃើញឈ្មោះ លឿម គា អាយុ២៧ឆ្នាំ ស្រវឹងដេកលើអង្រឹង ក៏ទាញកំណល់ឈើវាយសំពងចំក្បាលបណ្ដាលឱ្យរបួសធ្ងន់ ហើយរត់គេចខ្លួន ។ ប៉ុន្តែមិនបានប៉ុន្មានផង ក៏ត្រូវប៉ូលិសឃាត់ខ្លួនបាន យកមកសួរនាំនៅការិយាល័យជំនាញ ដើម្បីកសាងសំណុំរឿងបញ្ជូនទៅតុលាការចាត់ការតាមផ្លូវច្បាប់ ។
ហេតុការណ៍ឃាត់ខ្លួនបានជនដៃដល់នោះ បានធ្វើឡើងនៅថ្ងៃទី១១ ខែសីហា ឆ្នាំ២០២០នៅចំណុចភូមិខ្សី ឃុំសែនសុខ ស្រុកក្រឡាញ់ ខេត្តសៀមរាប ពីបទហិង្សាដោយចេតនាមានស្ថានទម្ងន់ទោស ។
លោកឧត្តមសេនីយ៍ត្រី ភឹង ចិន្តារ៉េត ស្នងការរងទទួលផែនការងារនគរបាលព្រហ្មទណ្ឌ បានប្រាប់ថា កាលពីថ្ងៃទី១១ ខែសីហា ឆ្នាំ២០២០ វេលាម៉ោង១៤ ឈ្មោះ លឿម គា ភេទប្រុស អាយុ២៧ឆ្នាំ នៅភូមិគោកក្នាំង ឃុំស្រែខ្វាវ ស្រុកអង្គរជុំ ខេត្តសៀមរាប បានទៅលេងផ្ទះស្ត្រីមេម៉ាយឈ្មោះ ឈើយ ម៉ាប់ អាយុ៤០ឆ្នាំ នៅភូមិតាកួយ ឃុំគោល ស្រុកអង្គរជុំ ក៏បានជួបគ្នានឹងឈ្មោះ ឈឿម ឆេន អាយុ៤៣ឆ្នាំ បបួលគ្នាផឹកស្រា ។
លោកស្នងការរងបានបន្ថែមថា នៅពេលបុរសក្មេង(ឈឿម គា)ដែលផឹកស្រាមុនស្រវឹងខ្លាំង ក៏ឡើងដេកលើអង្រឹងក្បែរកន្លែងផឹកស៊ី ចំណែកឈ្មោះ ឈឿម ឆេន ក៏នៅផឹកបន្តផ្ដោះផ្ដងជាមួយអ្នកមេម៉ាយផ្ទះម្ចាស់ ។ ខណៈនោះ ជនដៃដល់(ឈ្មោះ ឈឿម ឆេន) បានគិតថា បើមិនធ្វើអ្វីមួយទេ គូប្រជែងរបស់ខ្លួននេះច្បាស់ជាឈ្នះ ក្នុងល្បែងដណ្ដើមបេះដូងអ្នកមេម៉ាយនេះមិនខាន ។
គិតរួចក៏បានទាញកំណល់ឈើដែលខ្លួនអង្គុយ យកមកវាយលើក្បាលឈ្មោះ លឿម គា បណ្ដាលឱ្យរបួសធ្ងន់ ហើយរត់គេចខ្លួនបាត់ ។ក្រោយកើតហេតុ ជនរងគ្រោះត្រូវបានបញ្ជូនទៅមន្ទីរពេទ្យបង្អែកស្រុកអង្គរជុំ ដើម្បីជួយសង្គ្រោះ ។
លោកបានបញ្ជាក់ទៀតថា រហូតដល់ថ្ងៃទី១២ ខែសីហា ឆ្នាំ២០២០ វេលាម៉ោង១១ថ្ងៃត្រង់ នគរបាលស្រុកអង្គរជុំ បានចុះសហការជាមួយនគរបាលស្រុកក្រឡាញ់ បានធ្វើការឃាត់ខ្លួនជនដៃដល់នៅចំណុចភូមិខ្សី ឃុំសែនសុខ ស្រុកក្រឡាញ់ ខេត្តសៀមរាប រួចបញ្ជូនយកមកប្រគល់ឱ្យការិយាល័យជំនាញ ដើម្បីសួរនាំបន្ត ហើយរៀបចំកសាងសំណុំរឿងបញ្ជូនខ្លួនទៅកាន់តុលាការខេត្ត ចាត់ការតាមនីតិវិធីច្បាប់ ។
ពេលកម្លាំងជំនាញសួរនាំ ជនសង្ស័យបានសារ ភាព ថា ខ្លួនពិតជាបានប្រព្រឹត្តទៅលើជនរងគ្រោះពិតមែន ។ ជនដៃដល់ត្រូវបានកម្លាំងនគរបាលការិយាល័យជំនាញ រៀបចំកសាងសំណុំរឿងបញ្ជូនទៅតុលាការ ដើម្បីអនុវត្តតាមផ្លូវច្បាប់ ៕
ដកស្រង់ពី៖កោះសន្តិភាព