កូនតូចឈរជិតម្តាយកំពុងឈ្លោះគ្នា ត្រូវនារីដៃគូទំនាស់ គប់១កណ្តៀវធ្លុះដល់បេះដូងស្លាប់
- សេចក្ដីលម្អិត
- ជំពូក៖ ព័ត៌មានសន្តិសុខសង្គម
ខេត្តតាកែវ ៖ ករណីជម្លោះមួយ រវាងមនុស្សចាស់និងមនុស្សចាស់ ស្របពេលដែលកូនប្រុស អាយុ១៨ខែ បានឈរនៅក្បែរម្តាយដែលកំពុងឈ្លោះគ្នា ត្រូវបាននារីម្នាក់ក្នុងភាគីជម្លោះម្ខាងទៀតនោះ ទាញយកកណ្តៀវច្រូតស្រូវ ដែលមានចុងស្រួច គប់ទៅលើស្ត្រីដៃគូទំនាស់គ្នា ចៃដន្យ បែរជាត្រូវចំទ្រូងកុមារារូបនោះបណ្តាលអោយធ្លុះមុតដល់បេះដូងស្លាប់គួរឲ្យអាណោចអាធ័ម ។
ហេតុការណ៍ជម្លោះក្លាយជាហិង្សា រហូតឈានដល់មនុស្សឃាតដោយអចេតនានេះ បានកើតឡើងនៅវេលាម៉ោង១០និង៤០នាទី ព្រឹកថ្ងៃទី៣១ ខែសីហា ឆ្នាំ២០២០ ស្ថិតនៅភូមិទួលពង្រ ឃុំសោម ស្រុកគិរីវង់ ខេត្តតាកែវ ។
បើតាមសមត្ថកិច្ច បានឲ្យដឹងថា ករណីឃាតកម្មនេះ បង្កឡើងដោយស្ត្រីសង្ស័យឈ្មោះ សុន ណាលីន អាយុ១៨ឆ្នាំ (ជាមនុស្សមានសតិមិនប្រក្រតី) មានទីលំនៅភូមិឃុំកើត ហេតុខាងលើ បានយកកណ្តៀវច្រូតស្រូវ គប់ទៅលើស្ត្រីឈ្មោះ ស្រួច ស្រីម៉ៅ អាយុ៥០ឆ្នាំ មានទីលំនៅភូមិឃុំជាមួយគ្នា ប៉ុន្តែមិនត្រូវគូទំនាស់ទេ បែរជាទៅត្រូវចំក្មេងប្រុសម្នាក់ នៅឈរក្បែរនោះ ត្រូវចំទ្រូងមុតដល់បេះដូង ត្រូវបានក្រុមគ្រួសារបញ្ជូនទៅជួយសង្គ្រោះ នៅពេទ្យបង្អែកស្រុកគីរីវង់ ប៉ុន្តែអកុសល កុមារារងគ្រោះបានបាត់ជីវិតតាមផ្លូវ ។
សមត្ថកិច្ច បានឲ្យដឹងបន្តថា កុមារារងគ្រោះមានឈ្មោះ ឡូ សុភ័ក្ត្រ អាយុ១៨ខែ រងរបួសត្រូវចំដើមទ្រូងខាងឆ្វេង ដោយចុងស្រួចនៃកណ្តៀវ មុតចំបេះដូង ជម្រៅ ០,២សង់ទីម៉ែត្រ ។
ប្រភពពីអ្នកភូមិ នៅក្បែរកន្លែងកើតហេតុ បាននិយាយថា ស្ត្រីសង្ស័យ ជាមនុស្សមិនសូវគ្រប់ទឹក ឬសរសៃប្រសាទ ។ យ៉ាងណា មិនមានឯកសារបញ្ជាក់ទេថា ជនសង្ស័យពិតជាសសៃប្រសាទ ឬយ៉ាងនោះទេ ។ បច្ចុប្បន្ន សមត្ថកិច្ចបានឃាត់ខ្លួននារី អាយុ១៨ឆ្នាំរូបនេះ ដើម្បីបញ្ជូនទៅសាលាដំបូងខេត្តតាកែវ នៅថ្ងៃទី១ ខែកញ្ញា ឆ្នាំ២០២០នេះ ។
ពាក់ព័ន្ធករណីឃាតកម្មទៅលើកុមារារូបនេះ នៅព្រឹកថ្ងៃទី១ កញ្ញា ២០២០ មន្ត្រីជំនាញរបស់អង្គភាពការពារកុមារ (CPU) និងក្រុមការងារបច្ចេកទេស និងវិទ្យាសាស្ត្រ (FST) បានចុះទៅពិនិត្យនៅកន្លែងកើតហេតុ ដើម្បីផ្តល់ជាជំនួយដល់នគរបាលស្រុក ក្នុងការស៊ើបអង្កេត ៕
ដកស្រង់ពី៖កោះសន្តិភាព