ឮសំឡេងមុខផ្ទះ លុះមកមើលឃើញស្តែងនឹងភ្នែកយុវជន២នាក់កំពុងធ្វើសកម្មភាព
- សេចក្ដីលម្អិត
- ជំពូក៖ ព័ត៌មានសន្តិសុខសង្គម
រាជធានីភ្នំពេញ ៖ ជនសង្ស័យ២នាក់បើករ៉ឺម៉កសណ្តោង ដើរលួចឥវ៉ាន់ប្រជាពលរដ្ឋនៅពេលយប់ ហើយក៏ត្រូវប្រជាពលរដ្ឋដេញតាមឃាត់បានចំនួន២នាក់ បង្កឱ្យមានការភ្ញាក់ផ្អើលកាលពីម៉ោង២និង៣០នាទីរំលងអធ្រាត្រឈានចូលថ្ងៃទី៣ ខែកញ្ញា ឆ្នាំ២០២០ នៅភូមិស្រែជម្រៅ សង្កាត់ចោមចៅទី២ ខណ្ឌពោធិ៍សែនជ័យ ។
ជនសង្ស័យទាំងពីរនាក់ខាងលើមិនត្រូវបានស្គាល់អត្តសញ្ញាណនោះទេ ដោយម្នាក់មានអាយុ២០ឆ្នាំ និងម្នាក់អាយុ១៣ឆ្នាំ មុខរបរមិនពិតប្រាកដ ស្នាក់នៅភូមិភូមិកំរៀង សង្កាត់ព្រៃវែង។ តាមប្រភពពីម្ចាស់ឥវ៉ាន់ដែលចោរលួចខាងលើបានឱ្យដឹងថា ឥវ៉ាន់ និងរបស់របរគាត់បានដាក់នៅខាងមុខផ្ទះ ហើយតែងតែបាត់ជាញឹកញាប់ ។
នៅមុនពេលកើតហេតុពួកគាត់បានលឺសំឡេងជនសង្ស័យនៅខាងមុខផ្ទះ ហើយគាត់ក៏បានដាស់បងប្អូនរបស់គាត់ដើម្បីឱ្យជួយមើល លុះបន្ទាប់មកពួកគាត់បានឃើញជនសង្ស័យយកអីវ៉ាន់ដែលទុកនៅមុខផ្ទះ ពេលនោះពួកគាត់ចេញទៅខាងក្រៅ ហើយក៏បានជិះម៉ូតូដេញតាមឃាត់បានជនសង្ស័យចំនួន២នាក់ ក្នុងនោះជនសង្ស័យម្នាក់អាយុ២០ឆ្នាំ និងម្នាក់អាយុ១៣ឆ្នាំ។
ប្រភពដដែលបន្តថា ភ្លាមៗនោះដែរ រូបគាត់ជាជនរងគ្រោះក៏បានទាក់ទងទៅសមត្ថកិច្ចនគរបាលប៉ុស្តិ៍ចោមចៅទី២ មកជួយអន្តរាគមន៍ភ្លាមៗផងដែរ ដើម្បីយកទៅសួរនាំនៅប៉ុស្តិ៍នគរបាល។
បន្ទាប់ពីការសាកសួរ ជនសង្ស័យខាងលើបានសារភាពថា ជារៀងរាល់ថ្ងៃ គាត់ដើររើសអុសនៅតាមការដ្ឋាន តែយប់នេះ ពួកគាត់ដាច់លុយផងនោះ បានជាពួកគាត់ហ៊ានដាច់ចិត្តនាំគ្នាដើរលួចនៅពេលយប់តែម្ដងទៅ ។ក្រោយពេលកើតហេតុ ជនសង្ស័យខាងលើត្រូវបានសមត្ថកិច្ចឃាត់ខ្លួនកសាងសំណុំរឿងដើម្បីបញ្ជូនទៅផ្នែកជំនាញព្រហ្មទណ្ឌខណ្ឌពោធិ៍សែនជ័យចាត់ការតាមនីតិវិធី ៕
ដកស្រង់ពី៖កោះសន្តិភាព