ត្រឹមពាក្យសម្តីសោះ! លើកដៃផ្តាច់ជីវិតមិត្តភក្តិម្នាក់
- សេចក្ដីលម្អិត
- ជំពូក៖ ព័ត៌មានសន្តិសុខសង្គម
ខេត្តកំពង់ធំ ៖ បុរស២នាក់បបួលគ្នាផឹកស៊ី បន្ទាប់ក៏មានទំនាស់ពាក្យសម្តីគ្នា រហូតឈានដល់ការវាយតប់គ្នា បណ្តាលឱ្យបុរសម្នាក់រងរបួសធ្ងន់ ក្រោយមកក៏បានបាត់បង់ជីវិតពេលបញ្ជូនទៅសង្គ្រោះនៅមន្ទីរពេទ្យបង្អែកខេត្ត ។ហេតុការណ៍ខាងលើនេះបានបង្កអោយមានការភ្ញាក់ផ្អើលកាលពីយប់ថ្ងៃទី២៧ ខែកញ្ញា ឆ្នាំ២០២០ នៅចំណុចទួលដើមស្នាយ ទឹកដីឃុំត្បែង ស្រុកកំពង់ស្វាយ ខេត្តកំពង់ធំ ។
ជនសង្ស័យឈ្មោះ ឆឹម ពេង ភេទប្រុស អាយុ៣៦ឆ្នាំ មុខរបរធ្វើសំណង់ នៅភូមិបាគង ឃុំត្បែង ស្រុកកំពង់ស្វាយ ចំណែកជនរងគ្រោះឈ្មោះ ប៉ិច សុឃីម ភេទប្រុស អាយុ៣១ឆ្នាំ មុខរបរកម្មករស្រែប្រាំង រស់នៅភូមិឃុំជាមួយគ្នា។
យោងតាមការបំភ្លឺពីសាក្សីនៅកន្លែងកើតហេតុបានឲ្យដឹងថា មុនពេលកើតហេតុ ជនសង្ស័យទៅរកត្រីនៅចំណុចកើតហេតុខាងលើ ហើយបានបបួលជនរងគ្រោះទៅផឹកស្រានៅកន្លែងកើតហេតុ លុះផឹករហូតដល់ម៉ោង៧យប់ថ្ងៃទី២៧ កញ្ញា ពួកគេក៏ប្រកែកទាស់ពាក្យសំដីនឹងគ្នារហូតមានការវាយតប់គ្នា ដោយជនសង្ស័យបានវាយសំពងជនរងគ្រោះ បណ្តាលឲ្យជនរងគ្រោះរងរបួសយ៉ាងធ្ងន់ធ្ងរ ហើយត្រូវបានឈ្មោះ ឡូត ជាម្ចាស់ស្រែដឹកយកជនរងគ្រោះទៅមន្ទីរពេទ្យបង្អែកក្នុងភូមិតារាម ឃុំត្បែង ស្រុកកំពង់ស្វាយ ដើម្បីជួយសង្គ្រោះ ។
តាមប្រភពដដែលបានបន្តថា ដោយសារតែអាការៈរបួសធ្ងន់ធ្ងរពេក រហូតដល់ព្រឹកថ្ងៃទី២៨ ខែកញ្ញា ២០២០ សាច់ញាតិក៏ដឹកជនរងគ្រោះទៅកាន់មន្ទីរពេទ្បបង្អែកខេត្តកំពង់ធំព្យាបាលបន្តទៀត ហើយជនរងគ្រោះបានបាត់បង់ជីវិតនៅក្នុងបន្ទប់សង្គ្រោះបន្ទាន់ ។
ក្រោយពេលទទួលព័ត៌មានខាងលើភ្លាម សមត្ថកិច្ចជំនាញខេត្ត និងស្រុកព្រមទាំងគ្រូពេទ្យបានពិនិត្យសព រកឃើញនៅផ្នែកក្បាលមានស្នាមផុងលលាដ៍ក្បាលផ្នែកខាងឆ្វេង និងនៅផ្នែកខាងមុខមានស្នាមជាំភ្នែកទាំងសងខាង ច្រាលឈាមហូរចេញតាមមាត់ ។
បន្ទាប់ពីពិនិត្យរួច សមត្ថកិច្ចជំនាញបានដាក់ការសន្និដ្ឋានថា ជនរងគ្រោះបាត់បង់ជីវិតដោយសារត្រូវគេវាយ ។ ក្រោយពីបានពិនិត្យចប់សព្វគ្រប់រួចហើយ សមត្ថកិច្ចជំនាញបានធ្វើកំណត់ហេតុប្រគល់សព ជូនក្រុមគ្រួសារយកទៅធ្វើបុណ្យតាមប្រពៃណី ។ ចំណែកជនសង្ស័យ ត្រូវបានសមត្ថកិច្ចជំនាញកំពុងស្រាវជ្រាវចាប់យកមកផ្តន្ទាទោសតាមច្បាប់ ៕
ដកស្រង់ពី៖កោះសន្តិភាព