ក្រុមអ្នកផឹកស៊ី និងលេងល្បែង បង្កសំឡេងរំខាន ត្រូវសមត្ថកិច្ចប៉ុស្តិ៍ទឹកថ្លា ចុះផ្អាក
- សេចក្ដីលម្អិត
- ជំពូក៖ ព័ត៌មានសន្តិសុខសង្គម
រាជធានីភ្នំពេញ ៖ បន្ទាប់ពីប្រជាពលរដ្ឋរស់នៅតាមមូលដ្ឋាននានា ក្នុងរាជធានីភ្នំពេញ បានធ្វើការផ្ញើសារទៅតាមបណ្ដាញសង្គមហ្វេសប៊ុកផេក តាមបណ្ដាអធិការដ្ឋាននគរបាល ទាំង១៤ខណ្ឌ រាយការណ៍ពីស្ថានភាព ក្នុងការរស់នៅរបស់ពួកគាត់តាមភូមិ មានអ្នកលេងល្បែង មានអ្នកខ្លះផឹកស៊ី ស្រែកឡូឡា អ្នកខ្លះទៀត បានដាក់ធុងបាស ស្រែកច្រៀងបំពងសំឡេងខ្លាំងៗ រំខានដល់ដំណេក ។ល។
គេសង្កេតឃើញថា កម្លាំងនគរបាលតាមបណ្ដាខណ្ឌនីមួយៗ បានចុះទៅធ្វើការអប់រំ និងកិច្ចសន្យាដល់ក្រុមអ្នកផឹកស៊ីទាំងនោះ មិនបន្តឲ្យមានភាពអានាធិបតេយ្យទៀតឡើយ ។
ជាក់ស្តែង កាលពីវេលាម៉ោង០៩ និង៣០នាទីយប់ថ្ងៃ ទី០៦ ខែតុលា ឆ្នាំ២០២០នេះ ក្រោយទទួលបានខមមិនតាមហ្វេសប៊ុកពីប្រជាពលរដ្ឋភ្លាម កម្លាំងប៉ុស្តិ៍នគរបាលរដ្ឋបាលទឹកថ្លា បានចុះទៅដល់ទីតាំងផឹកស៊ី និងលេងបៀរ ដែលបង្កសំឡេងរំខាន និងបង្កបញ្ហា កកស្ទះផ្លូវ ពិបាកក្នុងការធ្វើដំណើរចេញ-ចូលផ្ទះរបស់ប្រជាពលរដ្ឋជិតខាង ។
សមត្ថកិច្ចបានធ្វើការអប់រំ ណែនាំដល់ពួកគាត់ កុំឲ្យផឹកស៊ីបង្កសំឡេងរំខាន និងលេងល្បែងស៊ីសងខុសច្បាប់ ដែល បង្កការរំខានដល់អ្នកជិតខាងទៀត ។ ជាចុងក្រោយ សមត្ថកិច្ចក៏បានបញ្ឈប់សកម្មភាពទាំងនេះផងដែរ ៕
ដកស្រង់ពី៖កោះសន្តិភាព