បុរស២នាក់ជិះឌុបគ្នាទៅធ្វើសកម្មភាពលើនារីម្នាក់ តែចុងក្រោយរត់មិនរួច
- សេចក្ដីលម្អិត
- ជំពូក៖ ព័ត៌មានសន្តិសុខសង្គម
រាជធានីភ្នំពេញ ៖ ជនសង្ស័យ២នាក់បានជិះម៉ូតូ១គ្រឿងឌុបគ្នាធ្វើសម្មភាពឆក់ទូរស័ព្ទដៃ១គ្រឿងពីស្ត្រីម្នាក់ក្នុងខណៈពេលដែលនាងកំពុងជិះម៉ូតូ១គ្រឿងតាមផ្លូវហើយនិយាយទូរស័ព្ទបណ្ដើរ ។
លុះពេលឆក់បានហើយក៏ព្យាយាមជិះរត់គេចខ្លួន ប៉ុន្តែរត់មិនរួចឡើយ ដោយស្ត្រីរងគ្រោះស្រែកថា ចោរៗ និងដេញតាមបង្កឲ្យមានការភ្ញាក់ផ្អើល ទើបគេនាំគ្នាជួយចាប់បានភ្លាមៗទាំង២នាក់ ប្រគល់ជូននគរបាលចាត់ការតាមច្បាប់ ។
ហេតុការណ៍នេះបានកើតឡើង កាលពីវេលាម៉ោង៧ព្រឹកថ្ងៃទី១៩ ខែតុលា ឆ្នាំ២០២០ នៅតាមមហាវិថីសហព័ន្ធរុស្ស៊ីត្រង់ចំណុចភ្លើងស្តុបកែងផ្លូវតាកន ស្ថិតនៅក្នុងភូមិព្រៃជីសាក់ សង្កាត់ចោមចៅទី៣ ខណ្ឌពោធិ៍សែនជ័យ រាជធានីភ្នំពេញ ។ជនសង្ស័យដែលត្រូវចាប់ខ្លួននោះទី១-ឈ្មោះ ជួន សុខជាតិ អាយុ១៤ឆ្នាំ ជាសិស្ស ស្នាក់នៅភូមិប៉ប្រ៉កខាងត្បូង សង្កាត់កាកាបទី១ ខណ្ឌពោធិ៍សែនជ័យ ស្រុកកំណើតនៅស្រុកចំការលើ ខេត្តកំពង់ចាម ។ ទី២-ឈ្មោះអេឡិច តារាពេជ្រ អាយុ១៨ឆ្នាំ ស្នាក់នៅភូមិចំការឪឡឹក សង្កាត់កាកាបទី១ ខណ្ឌពោធិ៍សែនជ័យ ។ ចំណែកស្ត្រីរងគ្រោះឈ្មោះ យឹម ធានី អាយុ២២ឆ្នាំ ជាបុគ្គលិកក្រុមហ៊ុនត្រូវជនសង្ស័យឆក់យកទូរស័ព្ទម៉ាក Iphone ។
តាមប្រភពព័ត៌មានបានឲ្យដឹងថា នៅមុនពេលកើតហេតុនារីរងគ្រោះបានជិះម៉ូតូ១គ្រឿងធ្វើដំណើរតាមមហាវិថីសហព័ន្ធរុស្សុីក្នុងទិសដៅពីជើងទៅត្បូង ។ លុះពេលទៅដល់ត្រង់ចំណុចកើតហេតុ ស្រាប់តែជនសង្ស័យទាំង២នាក់ខាងលើជិះម៉ូតូម៉ាកហុងដាឃ្លីក ពណ៌ឈាមជ្រូក១គ្រឿង ពាក់ផ្លាកលេខ កំពង់ចាម 1G-4244 តាមពីក្រោយ បានធ្វើសកម្មភាពឆក់យក ។
ទោះជាបែបណា ជនសង្ស័យក៏ត្រូវបានចាប់ខ្លួនយ៉ាងទាន់ហន់ ។ ក្រោយពេលអ្នកធ្វើដំណើរជួយដេញតាមរហូតដល់ភូមិព្រៃព្រីងខាងជើង សង្កាត់ចោមចៅទី៣ ទើបតាមទាន់និងឃាត់ខ្លួនបានហើយវាយម្នាក់១ដៃ១ជើងទ្រមខ្លួនប្រគល់ជូននគរបាលប៉ុស្តិ៍ចោមចៅទី៣ សាកសួរនិងកសាងសំណុំរឿងចាត់ការតាមច្បាប់ ។
ដកស្រង់ពី៖កោះសន្តិភាព