កូនប្រុសតិរច្ឆានម្នាក់ផឹកស្រវឹង ទាញអង្រែបុកគ្រឿងវាយម្តាយបង្កើតស្លាប់
- សេចក្ដីលម្អិត
- ជំពូក៖ ព័ត៌មានសន្តិសុខសង្គម
ខេត្តស្វាយរៀង ៖ កូនប្រុសតិរច្ឆានម្នាក់ ផឹកស្រាស្រវឹងហើយរករឿងឈ្លោះ ហើយយកអង្រែបុកគ្រឿងវាយទៅលើម្តាយបណ្តាលអោយស្លាប់ ត្រូវសមត្ថកិច្ចនគរបាលខេត្តស្វាយរៀង តាមចាប់ខ្លួនបានធ្វើនៅវេលាម៉ោង៦និង៣០នាទីព្រឹកថ្ងៃទី៥ ខែវិច្ឆិកា ឆ្នាំ២០២០ ស្ថិតនៅចំណុចវាលស្រែ ក្នុងភូមិមហាសួន ឃុំស្វាយយា ស្រុកស្វាយជ្រំ ។
សមត្ថកិច្ច បានឲ្យដឹងថា ជនសង្ស័យមានឈ្មោះ យឹម ធី អាយុ៣៩ឆ្នាំ មុខរបរមិនពិតប្រាកដ រស់នៅភូមិព្រៃបន្ទាយ ឃុំស្វាយយា ស្រុកស្វាយជ្រំ ។ ចំណែកម្ដាយរងគ្រោះមានឈ្មោះ យិន រី អាយុ៦៩ឆ្នាំ មុខរបរកសិករ ។
ប្រភពបន្តថា នាម៉ោង០៧និង១០នាទីយប់ថ្ងៃទី០៤ ខែវិច្ឆិកា ឆ្នាំ២០២០ ករណីឃាតកម្មនេះ បង្កឡើងដោយជនសង្ស័យម្នាក់ ត្រូវជាកូន ក្រោយផឹកស្រាស្រវឹង ហើយបានឈ្លោះប្រកែកគ្នាជាមួយម្តាយបង្កើតខ្លួន និងឈានដល់យកអង្រែបុកគ្រឿង វាយសំពងទៅលើម្តាយ បណ្តាលអោយបែក ដេកស្លាប់ភ្លាមៗនៅកន្លែងកើតហេតុ ។
ក្រោយទទួលបានរបាយការណ៍ភ្លាមៗ លោកឧត្តមសេនីយ៍ទោ កឹង ឃន ស្នងការនគរបាលខេត្ត បានដាក់បទបញ្ជាយ៉ាងម៉ឺងម៉ាត់ ដល់កម្លាំងជំនាញ នៃផែនការងារនគរបាលព្រហ្មទណ្ឌ ចុះសហការជាមួយកម្លាំងអធិការដ្ឋាននគរបាលស្រុកស្វាយជ្រំ ប៉ុស្តិ៍រដ្ឋបាល តាមចាប់ខ្លួនជនសង្ស័យតែម្តង ។ បច្ចុប្បន្នជនសង្ស័យត្រូវបានកម្លាំងនគរបាលកសាងសំណុំរឿងចាត់ការបន្តតាមនីតិវិធីច្បាប់ ៕
ដកស្រង់ពី៖កោះសន្តិភាព