សមត្ថកិច្ចសង្ស័យករណីមួយ ក្រោយឃើញទាំងសព និងម៉ូតូក្រោមស្ពាន
- សេចក្ដីលម្អិត
- ជំពូក៖ ព័ត៌មានសន្តិសុខសង្គម
ខេត្តកំពង់ឆ្នាំង ៖ បុរសម្នាក់ត្រូវបានគេប្រទះឃើញបាត់បង់ជីវិតក្រោមម៉ូតូនៅក្នុងទឹកប្រឡាយក្រោមស្ពាន បានបង្កឱ្យមានការភ្ញាក់ផ្អើលកើតឡើងកាលពីវេលាម៉ោង១១និង៣០នាទីព្រឹកថ្ងៃទី២ ខែមករា ឆ្នាំ២០២១ នៅចំណុចស្ពានថ្មមួយកន្លែង ស្ថិតក្នុងភូមិតាឡូ ឃុំព្រៃមូល ស្រុករលាប្អៀរ ខេត្តកំពង់ឆ្នាំង ។
ទាប់ពីមានការភ្ញាក់ផ្អើលខាងលើរួចមក សមត្ថកិច្ចនគរបាលបានចុះទៅពិនិត្យកន្លែងកើតហេតុ និងលើកយកសពចេញពីក្នុងទឹកជាមួយនឹងម៉ូតូ ទើបស្គាល់អត្តសញ្ញាណរបស់ជនរងគ្រោះ ។
ជនរងគ្រោះខាងលើឈ្មោះ យិន សុខឡា ភេទប្រុស អាយុ៣២ឆ្នាំ មានទីលំនៅភូមិគ្រួស ឃុំរលារប្អៀរ ស្រុករលារប្អៀរ ខេត្តកំពង់ឆ្នាំង ។តាមការសន្និដ្ឋានបានឱ្យដឹងថា មុនពេលកើតហេតុ ជនរងគ្រោះបានជិះម៉ូតូមួយគ្រឿងតែម្នាក់ឯង ម៉ាកហុងដាធុនសេ125 ពាក់ស្លាកលេខ កំពង់ឆ្នាំង 1E-9535 តាមបណ្តោយ ផ្លូវលំ ចេញពីភូមិព្រៃក្រោលសំដៅទៅភូមិតាឡូ លុះមកដល់កន្លែងកើតហេតុ ក៏បានជ្រុលធ្លាក់ពីលើស្ពានចូលទៅក្នុងទឹកប្រឡាយ បណ្ដាលអោយលង់បាត់បង់ជីវិតតែម្ដង ។
ក្នុងករណីគ្រោះថ្នាក់ចរាចរណ៍ខាងលើ សមត្ថកិច្ចនៅកន្លែងកើតហេតុបានសន្និដ្ឋានថា ជនរងគ្រោះជិះម៉ូតូលឿន លុះដល់ផ្លូវកោងបត់មិនទាន់ ក៏ធ្លាក់ចូលប្រឡាយ បណ្ដាលឱ្យរងគ្រោះថ្នាក់ដល់ជីវិតបែបនេះ ។ ក្រោយពេលកើតហេតុ សមត្ថកិច្ចបានប្រគល់សពជនរងគ្រោះទៅឱ្យក្រុមគ្រួសារដើម្បីយកទៅធ្វើបុណ្យតាមប្រពៃណី ៕
ដកស្រង់ពី៖កោះសន្តិភាព