អគ្គិភ័យឆាបឆេះឃ្លាំងសិប្បកម្មផលិតទ្វារជ័រ និងពិដានមួយកន្លែងនៅសង្កាត់វាលស្បូវ
- សេចក្ដីលម្អិត
- ជំពូក៖ ព័ត៌មានសន្តិសុខសង្គម
រាជធានីភ្នំពេញ ៖ ឃ្លាំងសិប្បកម្មផលិតទ្វារជ័រ និងពិដានមួយកន្លែងត្រូវបានអគ្គិភ័យឆាបឆេះ បង្កការភ្ញាក់ផ្អើលកាលពីវេលាម៉ោង០៣ និង៤០នាទីរសៀល ថ្ងៃទី២០ ខែមករា ឆ្នាំ២០២១ នៅចំណុចភូមិស្វាយតាអុក ស្ថិតក្នុងសង្កាត់វាលស្បូវ ខណ្ឌច្បារអំពៅ រាជធានីភ្នំពេញ។
ឃ្លាំងសិប្បកម្មដែលត្រូវឆាបឆេះគឺសាងសង់ឡើងពីដែកប្រក់ស័ង្កសី ដែលមានម្ចាស់ឈ្មោះ ចាន់ ណារឹទ្ធ ភេទប្រុស អាយុ៤០ឆ្នាំ ស្នាក់នៅក្បែរសិប្បកម្មកើតហេតុ។យោងតាមប្រភពព័ត៌មានឲ្យដឹងថា នៅមុនពេលកើតហេតុ ក្រុមកម្មករបានធ្វើការផ្សារដំបូលនៅចំណុចឃ្លាំងស្តុកថ្នាំពណ៌ ដោយមិនប្រយ័ត្ន បណ្តាលឲ្យខ្ទាតផ្កាភ្លើងទៅត្រូវនឹងជ័រប្លាស្ទីកដែលនៅក្បែរនោះ ក៏បង្កឲ្យមានភ្លើងឆាបឆេះឡើងខ្លាំងតែម្ដង។ ភ្លាមៗនោះក្រុមកម្មករបាននាំគ្នាស្រវេស្រវារត់ចេញមកខាងក្រៅ និងរាយការណ៍ជូនសមត្ថកិច្ចនគរបាលមូលដ្ឋានចុះអន្តរាគមន៍។
ក្រោយការទទួលព័ត៌មាន ក្រុមអាជ្ញាធរមូលដ្ឋាន រួមជាមួយរថយន្តពន្លត់អគ្គិភ័យជាច្រើនគ្រឿង បានចុះអន្តរាគមន៍សង្គ្រោះ។ ក្រោយការអន្តរាគមន៍ប្រមាណជិតមួយម៉ោងមក អណ្តាតភ្លើងត្រូវបានរលត់សូនសុងទៅវិញ ដោយបានឆាបឆេះបំផ្លាញឃ្លាំងស្តុកថ្នាំពណ៌ រូមជាមួយនឹងសម្ភារគ្រឿងជ័រ និងពិដានមួយចំនួនធំផងដែរ។
ក្នុងនោះក៏បានបង្កឲ្យមនុស្ស២នាក់រងរបួសផងដែរ ដែលជាកម្មករនៅធ្វើការនៅទីតាំងខាងលើ។ ក្នុងករណីនេះ សមត្ថកិច្ចជំនាញប្រើប្រាស់រថយន្តពន្លត់អគ្គិភ័យអស់២៨គ្រឿង ទើបអាចគ្រប់គ្រងស្ថានការណ៍បាន១០០ភាគរយ៕
ដកស្រង់ពី៖កោះសន្តិភាព