ដុតបំផ្លាញបង្គាចាក់ចាហួយ ជាង៦តោន នាំចូលពីវៀតណាម នៅទីលានចាក់សំរាម
- សេចក្ដីលម្អិត
- ជំពូក៖ ព័ត៌មានសន្តិសុខសង្គម
រាជធានីភ្នំពេញ ៖ បង្គាចាក់ចាហួយ ជាង៦តោន នាំចូលពីប្រទេសវៀតណាម ដែលកម្លាំងសមត្ថកិច្ចបង្ក្រាបបាន នៅទីតាំងលក់គ្រឿងសមុទ្រ ម្ដុំត្រឡោកបែកនោះ ត្រូវនាំយកទៅដុតបំផ្លាញហើយ នៅរសៀលទី០៨ ខែកុម្ភៈ ឆ្នាំ២០២១ ។
ពិធីដុតបំផ្លាញបង្គាខូចគុណភាព ប្រើប្រាសសាធាតុគីមីនេះ ធ្វើឡើងនៅទីលានចាក់សំរាមសង្កោ ខណ្ឌដង្កោ រាជធានីភ្នំពេញ ដោយមានការចូលរួមពីសំណាក់លោក ហេង មាលី ប្រធានសាខា ក.ប.ប. រាជធានីភ្នំពេញ, លោកនាយរងការិយាល័យ លោកនាយផ្នែក ចំណុះការិយាល័យនគរបាលប្រឆាំងបទល្មើសសេដ្ឋកិច្ចរាជធានីភ្នំពេញផងដែរ ។
គួររម្លឹកថា នាយប់ឈានចូលថ្ងៃទី០៦ ខែកុម្ភៈ ឆ្នាំ២០២១នេះ មន្ដ្រីសមត្ថកិច្ចកាំកុងត្រូល សហការជាមួយ កម្លាំងនគរបាលរាជធានីភ្នំពេញ បានបើកប្រតិបត្តិការបង្ក្រាបករណីការនាំចូល បង្គាមានចាក់បញ្ជូលចាហ៊ួយបន្ថែម សរុបចំនួន ៦,១៤២ គីឡូក្រាម ដឹកតាមរថយន្ដ២គ្រឿង ។សមត្ថកិច្ចបានអោយដឹងថា រថយន្តមួយគ្រឿង ត្រូវសមត្ថកិច្ចស្ទាក់ចាប់បាន នៅតាមបណ្តោយផ្លូវជាតិលេខ៣ ម្តុំទំនប់៧មករា និងរថយន្តមួយគ្រឿងទៀត ត្រូវបានស្ទាក់ចាប់ នៅម្តុំទីតាំងលក់គ្រឿងសមុទ្រត្រឡោកបែក តែម្តង ។
ភ្លាមៗ មន្ត្រីជំនាញ នៃអគ្គនាយកដ្ឋាន ក.ប.ប. បានធ្វើតេស្តបឋម លើបង្គាក្លាស្សេដែលមានផ្ទុកក្នុងរថយន្តទាំង២គ្រឿងខាងលើ នឹងបានរកឃើញមានការចាក់បញ្ជូលបន្ថែមចាហ៊ួយ ពិតប្រាកដមែន ។
តាមការអះអាងបឋមពីអ្នកបើកបររថយន្តដឹកទំនិញទាំង២គ្រឿងនេះ បានប្រាប់ថា បង្គាក្លាស្សេ សរុប៣០៧កេស បរិមាណប្រហែលជាង៦តោន មានប្រភពនាំតាមច្រកទ្វារអន្តរជាតិព្រែកចាក ព្រំដែនកម្ពុជា-វៀតណាម និងពុំមានឯកសារភ្ជាប់មកជាមួយទេ ។
ដោយមានការឯកភាពពីព្រះរាជអាជ្ញាអមសាលាដំបូងរាជធានីភ្នំពេញ រថយន្ត និងវត្ថុតាង ត្រូវបានបញ្ជូនមកអគ្គនាយកដ្ឋាន ក.ប.ប. ដើម្បីបន្តចាត់ការតាមនីតិវិធីច្បាប់ ៕
ដកស្រង់ពី៖កោះសន្តិភាព