បុរសម្នាក់បើកត្រាក់ទ័រភ្ជួរដីសុខៗ ជាន់មីនតោនផ្ទុះយ៉ាងកក្រើក
- សេចក្ដីលម្អិត
- ជំពូក៖ ព័ត៌មានសន្តិសុខសង្គម
ខេត្តឧត្តរមានជ័យ ៖ បើតាមសេចក្តីរាយការណ៍បានឱ្យដឹងថា អ្នកបើកត្រាក់ទ័រម្នាក់កំពុងបើកត្រាក់ទ័រភ្ជួរដីចំការ ស្រាប់ក៏ជាន់ត្រូវមីនតោនមួយគ្រាប់ដែលនៅសេសសល់កាលពីសម័យសង្គ្រាមស៊ីវិលធ្វើឱ្យផ្ទុះឡើងយ៉ាងកក្រើក បណ្តាលឱ្យអ្នកបើកត្រាក់ទ័ររងរបួសស្រាល បង្កការឱ្យមានការភ្ញាក់ផ្អើលកាលពីវេលាម៉ោង៥ល្ងាចថ្ងៃទី២៥ ខែមេសា ឆ្នាំ២០២១ នៅចំណុចដីចំការមួយកន្លែង ស្ថិតក្នុងភូមិទំនប់ ឃុំត្រពាំងតាវ ស្រុកអន្លង់វែងខេត្តឧត្តរមានជ័យ។
សេចក្តីរាយការណ៍ ជនរងគ្រោះខាងលើឈ្មោះ ឆាន ឡុង ភេទប្រុស អាយុ២៩ឆ្នាំ រងរបួសស្រាល និងជាអ្នកបើកបរគ្រាក់ទ័រ រស់នៅភូមិថ្មី ឃុំត្រពាំងតាវ ស្រុកអន្លង់វែង ខេត្តឧត្តរមានជ័យ។
លោកងួន ទ្ធី រិទ្ធមេបញ្ជាការអាវុធហត្ថស្រុកអន្លង់វែងបានឱ្យដឹងថា ក្រោយពីគ្រាប់មីនតោនផ្ទុះ លោកបានទទួលព័ត៌មានរាយការណ៍ពីប្រជាពលរដ្ឋថា មានករណីគ្រាប់មីនតោនផ្ទុះមួយគ្រាប់ ខណៈត្រាក់ទ័រកំពុងតែភ្ជួរដីចំការរបស់ខ្លួន ក៏ជាន់ត្រូវគ្រាប់មីនតោន បណ្តាលឱ្យផ្ទុះតែម្តង។
លោកបានបញ្ជាក់ថា បន្ទាប់មកលោកបានចាត់កម្លាំងអាវុធហត្ថចុះទៅដល់កន្លែងកើតហេតុឃើញថា ត្រាក់ទ័រខូចខាត និងដាច់ផាលត្រាក់ទ័រភ្ជួរដី ចំណែកអ្នកបើកវិញរងរបួសស្រាលផងដែរ។ លោកក៏បញ្ជាក់ទៀតថា ករណីគ្រាប់មីនផ្ទុះនេះ មិនមែនជាលើកទី១ទេ ហើយករណីនេះក៏កើតមានឡើងជាញឹកញាប់មកហើយ៕
ដកស្រង់ពី៖កោះសន្តិភាព