រថយន្តបែនដឹកដីខ្សាច់មួយគ្រឿង រ៉េចង្កូត ឆ្លងផ្លូវកាត់សួនច្បារ ទៅបុករថយន្តមួយគ្រឿង ហើយជ្រុលបុកចូលផ្ទះ
- សេចក្ដីលម្អិត
- ជំពូក៖ ព័ត៌មានសន្តិសុខសង្គម
រាជធានីភ្នំពេញ៖ រថយន្តបែនដឹកដីខ្សាច់ធុនធំមួយគ្រឿង បានបើកបរ ក្នុងល្បឿនលឿន បានរ៉េចង្កូតបុករះ សួនច្បារខណ្ឌចែកទ្រូងផ្លូវ ហើយឆ្លងទៅបុករថយន្តមួយគ្រឿង ក្នុងទិសដៅបញ្ច្រាស់គ្នា រួចជ្រុលទៅបុកចូលផ្ទះលក់ដូរ រងការខូចខាតយ៉ាងធ្ងន់ធ្ងរ តែសំណាងល្អ ពុំបណ្តាលអោយមនុស្សរងរបួសឡើយ។
គ្រោះថ្នាក់ចរាចរណ៍នេះ បានកើតឡើង កាលពីវេលាម៉ោងប្រមាណ ២ និង ៣៥នាទីរសៀល ថ្ងៃទី២២ ខែកក្កដា ឆ្នាំ២០២១ ស្ថិតនៅតាមបណ្តោយមហាវិថីឈ្នះឈ្នះ ក្នុងភូមិផ្សារលិច សង្កាត់ព្រែកព្នៅ ខណ្ឌព្រែកព្នៅ រាជធានីភ្នំពេញ។
រថយន្ត ដែលបង្កគ្រោះថ្នាក់ ជាប្រភេទរថយន្តបែនដឹកខ្សាច់ធុនធំមួយគ្រឿង ពណ៌ស ពាក់ស្លាកលេខ ព្រះសីហនុ 3A-1679 បើកបរ ដោយបុរសម្នាក់ មិនស្គាល់អត្តសញ្ញាណឡើយ។
សាក្សី បានអោយដឹងថា នៅមុនពេលកើតហេតុ គេបានឃើញរថយន្តបែនដឹកខ្សាច់ធុនធំមួយគ្រឿងខាងលើ បើកបរតាមបណ្តោយមហាវិថីឈ្នះឈ្នះ ក្នុងទិសដៅពីលិចទៅកើត ក្នុងល្បឿនលឿន ពេលមកដល់កន្លែងកើតហេតុ មិនដឹងមូលហេតុអ្វីនោះទេ ក៏បានរ៉េចង្កូតទៅខាងឆ្វេងដៃ បុកខឿនសួនច្បារ ខណ្ឌចែកទ្រូងផ្លូវ រួចឡើងសួនបន្តទៅបុកជាមួយរថយន្តម៉ាក Sports ពណ៌ទឹកប្រាក់ ពាក់ស្លាកលេខ ភ្នំពេញ 2AY-5262 មួយគ្រឿង ដែលបើកបរក្នុងទិសដៅបញ្ច្រាស់ទិសគ្នាពេញទំហឹង បណ្តាលអោយរងការខូចខាតផ្នែកខាងក្រោយចំហៀងខាងឆ្វេងយ៉ាងដំណំ។ ព័ត៌មាន អោយដឹងទៀតថា ខណៈនោះ រថយន្តនោះ មិនទាន់អស់ល្បឿន ជ្រុលទៅបុកចូលផ្ទះអ្នកលក់ដូរជាប់ ទៅមុខលែងរួច។
គ្រោះថ្នាក់នេះ ចាត់ទុកជាសំណាងហើយ ដែលពុំបណ្តាលអោយមនុស្សរងរបួសឡើយ។ បន្ទាប់ពីគ្រោះថ្នាក់ សមត្ថកិច្ចមូលដ្ឋាន បានចុះមកដល់ទីតាំងកន្លែងកើតហេតុ រួចទាក់ទងទៅនគរបាលចរាចរណ៍ ចុះទៅវាស់វែង បញ្ជូន ទៅកាន់ការិយាល័យចរាចរណ៍ការិយាល័យផ្លូវគោកនៃស្នងការដ្ឋាននគរបាលរាជធានីភ្នំពេញ ដើម្បីដោះស្រាយ សងការខូចខាត៕
ដកស្រង់ពី៖កោះសន្តិភាព