បុរស២នាក់ភ័យស្លន់រត់ចោលម៉ូតូ ក្រោយលេចមុខយុវជន១ក្រុមកាន់អាវុធដេញតាម
- សេចក្ដីលម្អិត
- ជំពូក៖ ព័ត៌មានសន្តិសុខសង្គម
បុរសពីរនាក់ជិះម៉ូតូចេញពីញ៉ាំអីនៅហាងមួយកន្លែង ក៏ត្រូវក្រុមក្មេងស្ទាវមួយក្រុមជិះដេញតាមវាយ និងកា.ប់ ក្នុងបំណងយកស្លាកលេខម៉ូតូ តែមិនបានសម្រេច ក៏នាំគ្នាជិះគេចខ្លួនបាត់ស្រមោលអស់ បង្កឲ្យមានការភ្ញាក់ផ្អើលកាលពីវេលាម៉ោង១និង១៥នាទីរំលងអធ្រាត្រឈានចូលថ្ងៃទី១៣ ខែធ្នូ ឆ្នាំ២០២១ នៅត្រង់ចំណុចខាងជើងស្ពានអាកាសផ្សារដីហុយ តាមបណ្ដោយផ្លូវហាណូយ ស្ថិតក្នុងសង្កាត់ទឹកថ្លា ខណ្ឌសែនសុខ។
បើតាមប្រភពព័ត៌មានពីបុរសរងគ្រោះម្នាក់ឈ្មោះ ទុច កុសល អាយុ២០ឆ្នាំ ជាអ្នករត់ម៉ូតូកង់បី បានរៀបរាប់ឲ្យដឹងថា នៅមុនពេលកើតហេតុ ពួកគាត់ទាំងពីរនាក់បានជិះម៉ូតូមួយគ្រឿងម៉ាក ស៊ុយហ្ស៊ុយគីនិច ពណ៌ស ពាក់ស្លាកលេខ ភ្នំពេញ 1FV-5820 ទើបតែជិះចេញពីញ៉ាំអីនៅហាងមួយកន្លែង ក្បែរកន្លែងកើតហេតុ ក្នុងបំណងជិះដឹកគ្នាត្រឡប់ទៅផ្ទះវិញនៅឯចោមចៅ ដោយជិះតាមបណ្ដោយផ្លូវហាណូយ ទិសដៅពីជើងទៅត្បូង ។បុរសរងគ្រោះបន្តថា លុះពេលជិះមកដល់ចំណុចកើតហេតុ ក៏ស្រាប់តែមានក្មេងស្ទាវមួយក្រុមមានគ្នាជាង១០នាក់ ជិះម៉ូតូ៧ទៅ៨គ្រឿងមិនចាំម៉ាក បានជិះតាមពីក្រោយគាត់ទាំង២នាក់ ហើយក្នុងដៃប្រដាប់ទៅដោយកាំបិតប៉័ងតាំងតោ និងដុំថ្ម រួចក៏ធ្វើសកម្មភាពធាក់ផ្តួលម៉ូតូរបស់របស់គាត់ (ជនរងគ្រោះ) បណ្តាលឲ្យដួលតែម្តង។
ប្រភពដដែលបន្តថា គ្រានោះបានធ្វើឲ្យគាត់ទាំង២នាក់ (ជនរងគ្រោះ) មានការភ័យស្លន់ស្លោក៏នាំគ្នាស្ទុះងើបរត់ចោលម៉ូតូយករួចខ្លួនតែម្តង ចំណែកក្រុមក្មេងស្ទាវទាំងនោះវិញ ក៏បានឈប់ម៉ូតូ រួចស្ទុះចុះទៅវាយ និងកា.ប់កម្ទេចម៉ូតូរបស់គាត់ (ជនរងគ្រោះ) បណ្តាលឲ្យបែកចង្កៀងនិងក្បាំងរងការខូចខាត ថែមទាំងមានបំណងកាច់យកស្លាកលេខម៉ូតូរបស់គាត់ទៀតផង (ជនរងគ្រោះ) តែកាច់មិនបានសម្រេច ក្រោយមកក្រុមក្មេងស្ទាវនោះក៏ដកយកតែសោម៉ូតូ រួចក៏នាំគ្នាជិះគេចខ្លួនចេញពីកន្លែងកើតហេតុបាត់ស្រមោលដោយសុវត្ថិភាពទៅ។ក្រោយពេលកើតហេតុ ក៏មានសមត្ថកិច្ចមូលដ្ឋានប៉ុស្តិ៍នគរបាលរដ្ឋបាលទឹកថ្លា បានចុះមកអន្តរាគមន៍ និងបាននាំជនរងគ្រោះទៅដាក់ពាក្យបណ្ដឹងនៅប៉ុស្តិ៍នគរបាលរដ្ឋបាលទឹកថ្លា ដើម្បីឲ្យសមត្ថកិច្ចធ្វើការស្រាវជ្រាវតាមចាប់យកក្រុមក្មេងស្ទាវទាំងនោះ យកមកផ្តន្ទាទោសទៅតាមផ្លូវច្បាប់ជាបន្តទៀត៕
ដកស្រង់ពី៖ កោះសន្តិភាព