ចាប់ខ្លួនបុរស២នាក់ទៀត ស្ថិតក្នុងចំណោមមេដឹកនាំញុះញង់ឲ្យមានការប្រមូលផ្តុំតវ៉ា នៅណាហ្គាវើលដ៍
- សេចក្ដីលម្អិត
- ជំពូក៖ ព័ត៌មានសន្តិសុខសង្គម
កម្លាំងសមត្ថកិច្ច នៃស្នងការដ្ឋាននគរបាលរាជធានីភ្នំពេញ បានឃាត់ខ្លួនបុរស២នាក់ទៀត តាមដីការបស់តុលាការ ដែលពាក់ព័ន្ធនឹងការញុះញង់ឲ្យមានការប្រមូលផ្តុំតវ៉ាដោយខុសច្បាប់ នៅមុខក្រុមហ៊ុនណាហ្គាវើលដ៍ ។
មនុស្ស២នាក់ទៀតដែលត្រូវឃាត់ខ្លួននារសៀលថ្ងៃទី០៤ ខែមករា ឆ្នាំ២០២២នេះ រួមមានទី១ ឈ្មោះ សុខ ណារិទ្ធ ភេទប្រុស និងឈ្មោះ សុខ គង្គា ភេទប្រុស ។ អ្នកទាំង២ ស្ថិតនៅក្នុងចំណោមជនត្រូវចោទ ៩នាក់ ដែលត្រូវបានអយ្យការអមសាលាដំបូងរាជធានីភ្នំពេញ ចោទប្រកាន់ពីបទ ញុះញង់បង្កឲ្យមានភាពវឹកវរធ្ងន់ធ្ងរដល់សន្តិសុខសង្គម តាមមាត្រា៤៩៤ និងមាត្រា៤៩៥ នៃក្រមព្រហ្មទណ្ឌ ។ ក្នុងចំណោមជនត្រូវចោទទាំង ៩នាក់ ត្រូវបានចៅក្រមស៊ើបសួរ នៃសាលាដំបូងរាជធានីភ្នំពេញ សម្រេចឃុំខ្លួន ចំនួន ៦នាក់ហើយ កាលពីថ្ងៃម្សិលមិញ ខណៈ ជនត្រូវចោទម្នាក់ទៀត ឈ្មោះឈឹម ស៊ីថរ កំពុងរត់គេចខ្លួន ។ សូមជម្រាបថា ថ្លែងនៅក្នុងសន្និសីទសារព័ត៌មាន នៅព្រឹកថ្ងៃទី៤ ខែមករា ឆ្នាំ២០២២នេះ លោកឧត្តមសេនីយ៍ទោ ប៊ុន សុសិក្ខា ស្នងការរងនគរបាលរាជធានីភ្នំពេញ បានថ្លែងថា ក្នុងកិច្ចការងារស៊ើបអង្កេតប្រមូលបានវត្ថុតាងនានា ពាក់ព័ន្ធនឹងការធ្វើបាតុកម្មរបស់អតីតបុគ្គលិកណាហ្គាវើល រកឃើញថា មេដឹកនាំធ្វើបាតុកម្មខុសច្បាប់បានទទួលលុយឧបត្ថម្ភពីក្រៅប្រទេស ដើម្បីបង្កនូវភាពវឹកវរនៅក្នុងស្រុក ៕
ដកស្រង់ពី៖ កោះសន្តិភាព