មិនធម្មតា បុរសម្នាក់ ស្រវឹង បើករថយន្ត Ford Ranger ស្លាកលេខ ខេមរភូមិន្ទ ក្រឡាប់ បុកបង្គោលភ្លើង ដួលសង្កត់លើម៉ូតូរម៉កកង់បី
- សេចក្ដីលម្អិត
- ជំពូក៖ ព័ត៌មានសន្តិសុខសង្គម
បុរសម្នាក់ ស្រវឹងជោគជាំ បើកបររថយន្ត Ford Ranger ស្លាកលេខ ខេមរភូមិន្ទ មួយគ្រឿង បោះពួយយ៉ាងលឿន ខ្វះការប្រុងប្រយ័ត្នជ្រុលទៅបុកបង្គោលភ្លើងបំភ្លឺផ្លូវ បាក់ដួលរលំសង្កត់លើម៉ូតូរម៉កកង់បីមួយគ្រឿង។
រថយន្តក្រឡាប់ផ្ងារជើង កាលពីវេលាម៉ោង ២ និង ៣០នាទី រំលងអាធ្រាត្រ ឈានចូលថ្ងៃទី១១ ខែឧសភា ឆ្នាំ២០២២ ត្រង់ចំណុចស្តុបអាងទឹកអូឡាំពិក តាមបណ្ដោយផ្លូវ២១៥ ក្នុងសង្កាត់វាលវង់ ខណ្ឌ៧មករា។ប្រភពព័ត៌មានពីកន្លែងកើតហេតុ បានឲ្យដឹងថា នៅមុនពេលកើតហេតុ គេឃើញបុរសម្នាក់ស្រវឹងជោគជាំ បើកបររថយន្តមួយគ្រឿងម៉ាក Ford Ranger ពណ៌ត្រេអ៊ី ពាក់ស្លាកលេខ ខេមរភូមិន្ទ 01 2-1462 តាមបណ្ដោយផ្លូវព្រះសីហនុ ទិសដៅពីកើតទៅលិច និងឆ្ពោះទៅផ្លូវ ២១៥ដោយក្នុងល្បឿនយ៉ាងលឿន លុះដល់ចំណុចកើតហេតុ រថយន្តនោះ ក៏បានរេចង្កូតទៅខាងស្ដាំ រួចក៏បានជ្រុលទៅបុកបង្គោលភ្លើងបំភ្លឺផ្លូវពេញទំហឹង បណ្តាលឲ្យរថយន្តក្រឡាប់ផ្ងារជើងរងការខូចខាតយ៉ាងដំណំ។ ចំណែកឯបង្គោលភ្លើងបំភ្លឺផ្លូវមួយដើម បានបាក់ដួលរលំសង្កត់ទៅលើម៉ូតូរម៉កកង់បីមួយគ្រឿង ដែលឈប់ចតស្ងៀម នៅលើចិញ្ចើមផ្លូវ បណ្តាលឲ្យម៉ូតូរម៉កកង់បីវៀចដំបូល រងការខូចខាត តែមិនបង្កឲ្យមាននរណាម្នាក់ រងរបួសនោះទេ។ ក្រោយពេលកើតហេតុ សមត្ថកិច្ចមូលដ្ឋាន និងសមត្ថកិច្ចជំនាញ ក៏បានចុះមកធ្វើការវាស់វែងស្ទូចយករថយន្តបង្ក និងម៉ូតូរម៉កកង់បី យកទៅរក្សាទុកនៅការិយាល័យចរាចរណ៍ផ្លូវគោកនៃស្នងការដ្ឋាននរគបាលរាជធានីភ្នំពេញ ដើម្បីរង់ចាំដោះស្រាយទៅតាមផ្លូវច្បាប់ នៅពេលក្រោយជាបន្តទៀត៕
ដកស្រង់ពី៖ កោះសន្តិភាព