បំបែកសំណុំរឿងលួចលុយ ១៥ម៉ឺនដុល្លារ នគរបាលព្រហ្មទណ្ឌឃាត់ខ្លួនចិន២នាក់ នៅខណ្ឌទួលគោក
- សេចក្ដីលម្អិត
- ជំពូក៖ ព័ត៌មានសន្តិសុខសង្គម
កម្លាំងជំនាញការិយាល័យព្រហ្មទណ្ឌកម្រិតស្រាល នៃនាយកដ្ឋាននគរបាលព្រហ្មទណ្ឌ បានបំបែកសំណុំរឿងលួចលុយ ១៥ម៉ឺនដុល្លារ ដោយឃាត់ខ្លួនជនសង្ស័យជាជាតិចិនចំនួន ២នាក់ នៅខណ្ឌទួលគោក ។
ករណីលួចប្រាក់ចំនួន ១៥០,០០០ដុល្លារ បានកើតឡើងកាលពីថ្ងៃទី៣១ ខែឧសភា ឆ្នាំ២០២២ នៅត្រង់ចំណុចខាងមុខផ្សារទំនើបឈ្មោះ សឺជីហួរលាន សង្កាត់ផ្សារថ្មីទី២ ខណ្ឌដូនពេញ រាជធានីភ្នំពេញ លើជនរងគ្រោះឈ្មោះ SHENG GUANGYONG ភេទប្រុស អាយុ៦៥ឆ្នាំ ជនជាតិចិន ។ យោងតាមកាមេរ៉ាសុវត្ថិភាព និងបើកការសើបសង្កេតបមឋរបស់កម្លាំងជំនាញនគរបាលព្រហ្មទណ្ឌ រហូតឈានដល់ការកំណត់មុខសញ្ញា ព្រមទាំងឃាត់ខ្លួនជនសង្ស័យ នៅវេលាម៉ោង១១និង២៥នាទីថ្ងៃទី១០ ខែមិថុនា ឆ្នាំ២០២២ បានចំនួន០២នាក់ រួមមាន ៖ ទី១-ឈ្មោះ WEI JING YUN ភេទប្រុស អាយុ៥៦ឆ្នាំ ជនជាតិចិន និងទី២-ឈ្មោះ QING YUI YUN ភេទប្រុស អាយុ៤១ឆ្នាំ ជនជាតិចិន នៅត្រង់ចំណុចផ្លូវ២៨៩ កែងផ្លូវ៥១៦ សង្កាត់បឹងកក់ទី២ ខណ្ឌទួលគោក រាជធានីភ្នំពេញ ដើម្បីនាំខ្លួនយកមកធ្វើការសាកសួរ ។
សម្ភារដែលដកហូតបានរួមមាន ៖
-ម៉ូតូ០១គ្រឿង ម៉ាកហុងដាឌ្រីម ពណ៌ខ្មៅ ផលិតឆ្នាំ២០១៦ ពាក់ស្លាកលេខ ភ្នំពេញ 1FR-5515
-ទូរសព្ទចំនួន០២គ្រឿង ម៉ាក OPPO ពណ៌ខៀវ និងម៉ាកVIVO ពណ៌ផ្កាឈូក
-កូនកាំបិតស្នៀតចំនួន០២
-តួឡឺវិស ចំនួន០១
-សោរកាច់ អក្សរT ចំនួន០៣ (ទុកសម្រាប់កាច់សោរទ្វាររថយន្ត
-សោរចិញ្ជៀន លេខ៨-៩ ចំនួន០២ -មេដែកចំនួន០១។
ប្រតិបត្តិការខាងលើនេះ ធ្វើឡើងដោយអនុវត្តតាមបទបញ្ជារបស់នាយឧត្តមសេនីយ៍ សន្ដិបណ្ឌិត នេត សាវឿន អគ្គស្នងការនគរបាលជាតិ, ឧត្តមសេនីយ៍ឯក អ៉ិន បូរ៉ា អគ្គស្នងការរងទទួលផែន និងការចង្អុលបង្ហាញពីឧត្តមសេនីយ៍ឯក ង៉េង ជួ ប្រធាននាយកដ្ឋាននគរបាលព្រហ្មទណ្ឌ និងដឹកនាំប្រតិបត្តិការដោយ លោកវរសេនីយ៍ឯក ប៊ុត វណ្ណារដ្ឋ អនុប្រធាននាយកដ្ឋាន ។ បច្ចុប្បន្ន ជនសង្ស័យខាងលើបាននាំមកកាន់នាយកដ្ឋាន ដើម្បីធ្វើការសាកសួរ និងកសាងសំណុំរឿង បញ្ជូនទៅអយ្យការអមសាលាដំបូងរាជធានីភ្នំពេញចាត់ការតាមនីតិវិធី ៕
ដកស្រង់ពី៖ កោះសន្តិភាព