ដុតសម្លៀកបំពាក់ បណ្តាលឲ្យឆាបឆេះផ្ទះមួយកន្លែងនៅម្ដុំផ្សារអូរឫស្សី
- សេចក្ដីលម្អិត
- ជំពូក៖ ព័ត៌មានសន្តិសុខសង្គម
រាជធានីភ្នំពេញ ៖ ព័ត៌មានជាបឋមបានអោយដឹងថា ករណីអគ្គិភ័យឆាបឆេះផ្ទះប្រជាពលរដ្ឋមួយកន្លែង ដែលស្ថិតនៅចំណុចផ្ទះលេខ១៩ ជាន់ទី១ ផ្លូវលេខ១៨២ ភូមិ៧ សង្កាត់អូរឫស្សី៤ ខណ្ឌ៧មករា រាជធានីភ្នំពេញ នៅវេលាម៉ោង០៦និង២០នាទី ថ្ងៃទី១០ ខែមករា ឆ្នាំ២០២៤ ។
លោកវរសេនីយ៍ឯក ព្រហ្ម យ៉ន នាយការិយាល័យនគរបាលបង្ការពន្លត់អគ្គិភ័យ និងសង្គ្រោះ នៃស្នងការដ្ឋាននគរបាលរាជធានីភ្នំពេញ បានឲ្យដឹងថា ក្រោយកើតហេតុ កម្លាំងនគរបាល និងរថយន្តពន្លត់អគ្គិភ័យ បានទៅដល់ទីតាំងកើតហេតុ និងបានធ្វើការជួយសង្គ្រោះអន្តរាគមន៍បាញ់ទឹកពន្លត់ឲ្យរលត់ទាំងស្រុង ដោយប្រើប្រាស់រថយន្ត ចំនួន០៤គ្រឿង ប្រើប្រាស់ទឹកអស់ ០២ឡាន ស្មើរនឹង០៨ម៉ែត្រគូប និងរថយន្តជំនួយមកពីផ្សារទំនើបអូឡាំព្យា ចំនួន០២គ្រឿង ប្រើប្រាស់ទឹកអស់០១ឡាន ស្មើរនឹង០៤ម៉ែត្រគូប ។
លោកវរសេនីយ៍ឯក ព្រហ្ម យ៉ន បានបន្តថា ដោយទីតាំងខាងលើជាប្រភេទសំណង់ ថ្មបេតុង ទំហំ (៣ម៉ែត្រ x ៤ម៉ែត្រ) និងធ្វើឲ្យខូចខាតសម្ភារឆេះបន្ទប់ដាក់សម្ភារៈជាន់ទី១ ទំហំ (៣ម៉ែត្រ x ៤ម៉ែត្រ) ចំនួន០១បន្ទប់ រួមទាំងសម្ភារៈអស់មួយចំនួន ។
ចំពោះមូលហេតុ ដែលបណ្តាលឲ្យមានករណីអគ្គិភ័យខាងលើនេះ លោកវរសេនីយ៍ឯក ព្រហ្ម យ៉ន បានអោយដឹងជាបឋមថា គឺបណ្តាលមកពីមនុស្សមានសតិមិនគ្រប់ក្នុងគ្រួសារ បានដុតសម្លៀកបំពាក់ បង្កជាអគ្គិភ័យតែម្តង។ ទោះជាយ៉ាងនេះក្តី អគ្គិភ័យនេះ ពុំបណ្តាលឲ្យអ្នកណាម្នាក់រងរបួស និងមិនបានឆេះរាលដាលដល់អ្នកក្បែរខាងឡើយ ៕
ដកស្រង់ពី៖កោះសន្តិភាព