នគរបាលខណ្ឌមានជ័យ ឃាត់ខ្លួនជនសង្ស័យម្នាក់ ដកហូតថ្នាំញៀន៨កញ្ចប់

សេចក្ដីលម្អិត

ជំពូក៖ ព័ត៌មានសន្តិសុខសង្គម

(ភ្នំពេញ)៖ នាយនគរបាលប៉ុស្ដិ៍ចាក់អង្រែលើ លោកអនុសេនីយ៍ទោ អ៊ំ រតនា បានថ្លែងប្រាប់ភ្នាក់ងារ Fresh News ឲ្យដឹងថា ជនសង្ស័យម្នាក់ ត្រូវបានកម្លាំងយាមល្បាតរបស់លោកឃាត់ខ្លួន ខណៈដែលកំពុងឈរលក់គ្រឿងញៀន នៅតាមបណ្ដោយផ្លូវលេខ៦០ម៉ែត្រ ត្រង់ចំណុចវាលខ្សាច់ ស្ថិតក្នុងក្រុម៨ ភូមិព្រែកតាគង់ សង្កាត់ចាក់អង្រែលើ ខណ្ឌមានជ័យ នាថ្ងៃទី១៦ ខែឧសភា ឆ្នាំ២០១៨ វេលាម៉ោង១៩៖៣០នាទីយប់ និងរកឃើញដកហូតក្រាមសថ្លាជាថ្នាំញៀន ចំនួន៨កញ្ចប់ផងដែរ។

លោកអនុសេនីយ៍ទោ អ៊ំ រតនា បានឲ្យដឹងថា ការបង្ក្រាបឃាត់ខ្លួនជនសង្ស័យជួញដូរគ្រឿងញៀនម្នាក់ឈ្មោះ មាស កុសល ហៅទូច ភេទប្រុស អាយុ៣៤ឆ្នាំ ដែលមានមុខរបររើសអេបចាយ និងស្នាក់នៅមិនពិតប្រាកដ ខាងលើនេះ បានអនុវត្តឡើង ស្របពេលដែលកម្លាំងនគរបាលប៉ុស្ដិ៍ចាក់អង្រែលើ ទទួលបានការដឹកនាំពីលោកវរសេនីយ៍ឯកអធិការនគរបាលខណ្ឌមានជ័យ តេង ស៊ីណូ ដើម្បីយាមល្បាតក្នុងភូមិសាស្ត្ររបស់ខ្លួន ទើបប្រទះឃើញបុរសខាងលើកំពុងតែឈរ និងមានការសង្ស័យក៍ឃាត់ត្រួតពិនិត្យ បានរកឃើញថ្នាំញៀន ចំនួន៨កញ្ចប់ថង់តូច ដែលជនសង្ស័យបានក្រវែងចោលនៅក្បែរនិងជើងខ្លួន ដើម្បីបង្វែងដាន ទើបឈានដល់ការឃាត់ខ្លួនយកមកធ្វើការសាកសួរ និងបញ្ជូនទៅកាន់អធិការដ្ឋាននគរបាលខណ្ឌមានជ័យ ក្នុងការកសាងសំណុំរឿង ចាត់ការតាមនិតិវិធីច្បាប់តែម្ដង៕

ដកស្រង់ពី៖FRESH NEWS