បញ្ជូនជនសង្ស័យ៥នាក់ ពាក់ព័ន្ធបទល្មើសជួលស្រ្តីឲ្យពពោះជំនួស ត្រូវបញ្ជូនទៅកាន់តុលាការ ដើម្បីកាត់ទោស ក្រោយសមត្ថកិច្ចចុះបង្ក្រាប នៅខណ្ឌឬស្សីកែវ

សេចក្ដីលម្អិត

ជំពូក៖ ព័ត៌មានសន្តិសុខសង្គម

(ភ្នំពេញ)៖ នគបាលការិយាល័យប្រឆាំងការជួញដូរមនុស្ស និងការពារអនីតិជន នៃស្នងការដ្ឋាននគរបាលរាជធានីភ្នំពេញ នៅព្រឹកថ្ងៃទី២៥ ខែមិថុនា ឆ្នាំ២០១៨នេះ បានបញ្ជូនខ្លួនក្រុមជនសង្ស័យ ប្រុសស្រី៥នាក់ ទៅកាន់សាលាដំបូងរាជធានីភ្នំពេញ ដើម្បីចាត់ការតាមច្បាប់ ពាក់ព័ន្ធរកណីជួលស្ត្រីខ្មែរឲ្យពពោះយកកូនទៅលក់ឲ្យជនបរទេស។

សូមបញ្ជាក់ថា កម្លាំងនគរបាលការិយាល័យប្រឆាំងការជួញដូរមនុស្ស និងការពារអនីតិជន សហការជាមួយកម្លាំងនគរបាលមូលដ្ឋាន បានចុះបង្ក្រាបករណីជួញដូរមនុស្សសម្រាប់នាំឆ្លងដែន និងបទធ្វើអន្តរការី នៃអំពើពពោះជំនួស ដោយឃាត់ខ្លួនជនសង្ស័យស្រីប្រុស៥នាក់ និងរំដោះបាននារីរងគ្រោះចំនួន៣៣នាក់។

ប្រតិបត្តិការចុះបង្ក្រាបការពពោះជំនួសនេះ ត្រូវបានធ្វើឡើងនៅល្ងាចថ្ងៃទី២១ ខែមិថុនា ឆ្នាំ២០១៨ ចំណុចផ្ទះវីឡាលេខ២A ផ្លូវ៣៤៨ និងផ្ទះវិឡាលេខ៩A ផ្លូវ៣៤៨ ស្ថិតនៅក្នុងបុរី វិមានភ្នំពេញ តាមបណ្ដោយផ្លូវលេខ៥ ក្នុងសង្កាត់ឬស្សីកែវ ខណ្ឌឬស្សីកែវ ដោយមានការបញ្ជាផ្ទាល់ពី នាយឧត្តមសេនីយ៍ ជួន សុវណ្ណ អគ្គស្នងការរង និងជាស្នងការនគរបាលរាជធានីភ្នំពេញ។

បើតាមនគរបាលប្រតិបត្តិការនេះ ស្ថិតក្រោមការសម្របសម្រួលពី លោក គុជ គីមឡុង ព្រះរាជអាជ្ញារង នៃអយ្យកាអមសាលាដំបូងរាជធានីភ្នំពេញ និងដឹកនាំបង្ក្រាបដោយ លោកឧត្តមសេនីយ៍ត្រី ចាន់ កិត្តិខុម ស្នងការរងទទួលផែនប្រឆាំងការជួញដូរមនុស្ស និងការពារអនីតិជន នៃស្នងការដ្ឋាននគរបាលរាជធានីភ្នំពេញ។

លោកឧត្តមសេនីយ៍ត្រី ចាន់ កិត្តិខុម បានឲ្យដឹងថា ក្នុងប្រតិបត្តិការនេះ ផ្ទះទី១៖ផ្ទះលេខ២A ផ្លូវ៣៤៨ ឃាត់ខ្លួនមនុស្សបានចំនួន២៥នាក់ ប្រុស២នាក់ ដែលបុរសម្នាក់ ឈ្មោះ LlU QlANG អាយុ៤៩ឆ្នាំ និងរថយន្ត១គ្រឿងម៉ាក់ស្តារិច ពណ៌ស ពាក់ស្លាកលេខ ព្រះសីហនុ2A-6883 ម៉ូតូហុងដា Today ពណ៌ខ្មៅ មួយគ្រឿង និងផ្ទះទី២៖ ផ្ទះលេខ៩A ផ្លូវ៣៤៨ ឃាត់ខ្លួនបានមនុស្សចំនួន១៨នាក់ រួមទាំងក្មេង២នាក់ និងរថយន្តមួយគ្រឿង ម៉ាក Lexus 470 ពណ៌ខ្មៅ ពាក់ស្លាកលេខភ្នំពេញ2C-8863 និងដកហូតឯកសារមួយចំនួន លិខិតឆ្លងដែន និងឯកសារពាក់ព័ន្ធផ្សេងៗ។

តាមប្រភពព័ត៌មានពីនារីរងគ្រោះ បានបញ្ជាក់ថា ដោយរាល់ថ្ងៃខ្លូនធ្វើការនៅរោចក្រ បន្ទាប់មកក៏មានមិត្តភ័ក្របបួល ដោយនិយាយថា បានលុយច្រើន រហូតដល់១ម៉ឺនដុល្លារ ពេលគិតៗទៅក៏យល់ព្រម ពេលនោះមិត្តភ័ក្រក៏បានឲ្យម៉ូតូឌុប ឌុបយកទៅបុរីវិមានភ្នំពេញតែម្ដង។

នារីរងគ្រោះបានបន្តទៀតថា ពេលរូបនាងបានសម្រេចចិត្តធ្វើការងារស៊ីឈ្នួលពពោះនេះ ពេលនោះគេក៏បាននាំទៅមន្ទីពេទ្យ ដើម្បីបាញ់មេជីវិតចូលដោយបានឈ្នួលក្នុងតម្លៃ ពពោះកូន១ បានចំនួន១ម៉ឺនដុល្លារ គិតចាប់ពីខែដំបូងឲ្យចំនួន៥០០ដុល្លារ ខែបន្ទាប់ៗមកទៀត៣០០ដុល្លារ រហូតដល់កើតទើបទទួលបានចំនួន៦០០០ដុល្លារបន្ថែមទៀត។

ក្រោយប្រតិបត្តិការ ស្រ្តីពពោះជំនួសចំនួន៣៣នាក់ ត្រូវបានបញ្ជួនទៅមន្ទីរសង្គមកិច្ចរាជធានីភ្នំពេញ រីឯអ្នកមិនពាក់ព័ន្ធ បានអនុញ្ញាតឲ្យត្រឡប់ទៅផ្ទះវិញ ខណៈជនសង្ស័យទាំង៥នាក់ ត្រូវបញ្ជូនទៅតុលាការនៅព្រឹកថ្ងៃនេះ៕

ដកស្រង់ពី៖FRESH NEWS