ក្នុងរយៈពេល ២ ខែដំបូង ភ្ញៀវទេសចរអន្តរជាតិមកកម្សាន្តនៅតំបន់អង្គរបានកើនឡើង ៥០ ភាគរយ
- សេចក្ដីលម្អិត
- ជំពូក៖ ព័ត៌មានទេសចរណ៍
យោងតាមគ្រឹះស្ថានអង្គរបានអោយដឹងថា តំបន់អង្គទទួលបានភ្ញៀវទេសចរអន្តរជាតិចំនួន ២៣៥.៨៥០ នាក់ក្នុងរយៈពេលពីរខែដំបូងនៃឆ្នាំ២០២៤ កើនឡើង៥០ ភាគរយពី ១៥៦.៩៥១ នាក់ក្នុងរយៈពេលដូចគ្នាកាលពីឆ្នាំមុន។
ប្រភពដដែលបានអោយដឹងទៀតថា តំបន់អង្គររកចំណូលបាន ១១,២ លានដុល្លារពីការលក់សំបុត្រក្នុងអំឡុងខែមករាដល់ខែកុម្ភៈឆ្នាំនេះដែលកើនឡើង ៥២ ភាគរយពី ៧,៣៨ លានដុល្លារក្នុងរយៈពេលដូចគ្នាកាលពីឆ្នាំមុន។
ស្ថិតនៅភាគពាយព្យនៃខេត្តសៀមរាប តំបនអង្គរទំហំ៤០១ គីឡូម៉ែត្រការ៉េ មានប្រាសាទបុរាណផ្សេងៗទៀតចំនួន៩១ប្រាសាទ ដែលត្រូវបានសាងសង់ឡើងពីសតវត្សទី៩ ដល់ទី១៣ ។
តំបន់អង្គរត្រូវបានចុះក្នុងបញ្ជីបេតិកភណ្ឌពិភពលោករបស់អង្គការអប់រំ វិទ្យាសាស្ត្រ និងវប្បធម៌របស់អង្គការសហប្រជាជាតិ (UNESCO) ក្នុងឆ្នាំ១៩៩២ គឺជាគោលដៅទេសចរណ៍ដ៏ពេញនិយមបំផុតនៅក្នុងប្រទេសកម្ពុជា។
មន្ត្រីរដ្ឋាភិបាលជឿជាក់ថា ឆ្នាំផ្លាស់ប្តូរវាងប្រជាជន និងប្រជាជនកម្ពុជា-ចិន ឆ្នាំ២០២៤ ដែលបានបើកកាលពីខែមករា នឹងក្លាយជាមេដែកទាក់ទាញភ្ញៀវទេសចរចិនមកកម្ពុជា ជាពិសេសទៅកាន់តំបន់អង្គរ។
លោក សុខ សូកេន រដ្ឋមន្ត្រីក្រសួងទេសចរណ៍បានថ្លែងក្នុងពិធីបើកកម្មវិធីឆ្នាំផ្លាស់ប្តូរវាងប្រជាជន និងប្រជាជនកម្ពុជា-ចិន ឆ្នាំ២០២៤ ដែលបានរៀបចំឡើងនៅលានជល់ដំរីថា “ខ្ញុំមានទំនុកចិត្តយ៉ាងមុតមាំថា ឆ្នាំផ្លាស់ប្តូរវាងប្រជាជន និងប្រជាជនកម្ពុជា-ចិន ឆ្នាំ២០២៤ នឹងក្លាយជាកម្លាំងចលករថ្មីមួយ ដើម្បីទាក់ទាញភ្ញៀវទេសចរ និងវិនិយោគិនចិនមកកម្ពុជាកាន់តែច្រើន”។
រដ្ឋលេខាធិការ និងជាអ្នកនាំពាក្យក្រសួងទេសចរណ៍ លោក តុប សុភ័គ សង្ឃឹមថា អាកាសយានដ្ឋានអន្តរជាតិសៀមរាបអង្គរដែលត្រូវបានដាក់ឱ្យដំណើរការកាលពីខែវិច្ឆិកា នឹងជួយទាក់ទាញភ្ញៀវទេសចរអន្តរជាតិឱ្យចូលមកកម្សាន្តតំបន់អង្គរកាន់តែច្រើន។
លោកបានបន្តថា “អាកាសយានដ្ឋានអន្តរជាតិនេះកំពុងដើរតួនាទីយ៉ាងសំខាន់ក្នុងការជួយជំរុញទេសចរណ៍ សេដ្ឋកិច្ច ពាណិជ្ជកម្ម ការវិនិយោគរបស់ប្រទេស”។
ជាមួយនឹងផ្លូវរត់ប្រវែង ៣៦០០ ម៉ែត្រ អាកាសយានដ្ឋានអន្តរជាតិកម្រិត 4E បច្ចុប្បន្នគឺជាព្រលានយន្តហោះដ៏ធំបំផុតរបស់កម្ពុជា និងជាច្រកទ្វារអន្តរជាតិដ៏សំខាន់។
ដកស្រង់ពី៖ ខ្មែរថាមស៍