មន្រ្តីឧទ្យានុរក្សនៅក្នុងតំបន់ការពារទេសភាពអន្លង់ព្រីងបានជួយសង្រ្គោះសត្វរនាលពណ៌មួយក្បាល
- សេចក្ដីលម្អិត
- ជំពូក៖ ព័ត៌មានទេសចរណ៍
មន្រ្តីឧទ្យានុរក្សនៅក្នុងតំបន់ការពារទេសភាពអន្លង់ព្រីង ខេត្តកំពត និងអង្គការជីវិតធម្មជាតិបានជួយសង្រ្គោះសត្វរនាលពណ៌មួយក្បាលឱ្យរួចផុតពីសេចក្ដីស្លាប់។
យោងតាមការចុះផ្សាយរបស់អង្គការជីវិតធម្មជាតិនៅកម្ពុជា (NatureLife Cambodia) កាលពីថ្ងៃទី៤ ខែឧសភា សត្វរនាលនេះត្រូវបានបញ្ជូនមកកាន់មជ្ឈមណ្ឌលសង្គ្រោះសត្វ ព្រៃភ្នំតាម៉ៅក្រោមការជួយសម្របសម្រួលដោយក្រុមការងារផ្នែកសុខភាពសត្វព្រៃរបស់អង្គការWCS។
ប្រភពដដែលបានអោយដឹងទៀតថា ក្រោយពីទទួលបានព័ត៌មានពីកសិករស្ថិតក្នុងភូមិកោះចំការ ឃុំបឹងសាលាខាងត្បូង ស្រុកកំពង់ត្រាច ខេត្តកំពត មន្ត្រីឧទ្យានុរក្សនិងបុគ្គលិកទីវាលអង្គការ ជីវិតធម្មជាតិនៅកម្ពុជា បានចុះទៅជួយសង្គ្រោះកូនរនាលពណ៌មួយក្បាល ដែលមានស្ថានភាពបាក់ស្លាបមួយ ចំហៀងយ៉ាងធ្ងន់ធ្ងរ (ពុំដឹងមូលហេតុ) ដើម្បីយកមករក្សាទុកនៅទីស្នាក់ការឧទ្យានុរក្សនិង បញ្ជូនបន្តមកកាន់ មជ្ឈមណ្ឌលសង្គ្រោះសត្វព្រៃភ្នំតាម៉ៅដើម្បីធ្វើការព្យាបាល។
ប៉ុន្តែស្លាបដែលបានបាក់មានសភាពធ្ងន់ធ្ងរពេក ក្រុមគ្រូពេទ្យពុំអាចសង្គ្រោះស្លាបឱ្យ ដូចដើម បានឡើយ និងបានសម្រេចចិត្តកាត់ស្លាបដែលបាក់ចេញ ដើម្បីការពារការឆ្លងរោគនិងសង្គ្រោះ ជីវិតសត្វ ស្លាបនេះ។ បច្ចុប្បន្នសត្វរនាលពណ៌កំពុងត្រូវបានយកចិត្តទុកដាក់ថែទាំពីសំណាក់ក្រុមគ្រូពេទ្យជំនាញ។
អង្គការជីវិតធម្មជាតិនៅកម្ពុជា បាននិយាយថា បន្ទាប់ពីមានគម្រោង ស្រូវមិត្តក្រៀល នៅតំបន់នេះយើងឃើញថាប្រជាកសិករមិនរំខានដល់សត្វស្លាបប ថែមទាំងចូលរួមអអភិរក្សការពារ។ ការផ្តល់ព័តមានដើម្បីចុះជួយសង្រ្គោះជាបន្ទាន់ដល់សត្វរនាលពណ៏នេះជាភស្តុតាងមួយដែលបង្ហាញពីកិច្ចសហការរបស់ប្រជាកសិករនៅតំបន់អន្លង់ព្រីងយើង។
ដកស្រង់ពី៖ ខ្មែរថាមស៍