ប្រជាពលរដ្ឋធ្វើចត្តាឡីស័ក១៤ថ្ងៃតាមផ្ទះ ចំនួន៥កន្លែង ក្នុងខណ្ឌឫស្សីកែវ បន្តទទួលគ្រឿងបរិភោគ ដើម្បីដោះស្រាយជីវភាពពីអភិបាលខណ្ឌ

Details

Category: National News

(ភ្នំពេញ)៖ ប្រជាពលរដ្ឋកំពុងធ្វើចត្តាឡីស័ករយៈពេល១៤ថ្ងៃតាមផ្ទះ ពាក់ព័ន្ធ ព្រឹត្តិការសហគមន៍២០កុម្ភៈ ចំនួន៥កន្លែង ក្នុងមូលដ្ឋានខណ្ឌប្ញស្សីកែវ នៅថ្ងៃទី១៩ ខែមីនា ឆ្នាំ២០២១ បានបន្តទទួលបានគ្រឿងឧបភោគបរិភោគ ដើម្បីដោះជីវភាពប្រចាំថ្ងៃពីមន្ត្រី នៃក្រុមការងាររដ្ឋបាលខណ្ឌ ដឹកនាំផ្ទាល់ដោយលោកអភិបាលខណ្ឌ ជា ពិសី និងជាសមាជិកក្រុមលេខាសម្ដេចតេជោ ហ៊ុន សែន នាយករដ្ឋមន្ត្រី នៃកម្ពុជា។

ក្នុងសកម្មភាពមនុស្សធម៌នេះ លោក ជា ពិសី បានព្យាយាមពន្យល់បង-ប្អូនប្រជាពលរដ្ឋ ឲ្យចងចាំកុំភ្លេចការអនុវត្តឲ្យបានខ្ជាប់ខ្ជួនតាមវិធានការក្រសួងសុខាភិបាល «៣ការពារ-៣កុំ-២ចូលរួម» ដែលជាសារផ្ដាំផ្ញើដឹកនាំ ដ៏ខ្ពង់ខ្ពស់របស់ សម្ដេចតេជោ ហ៊ុន សែន នាយករដ្ឋមន្ត្រី នៃកម្ពុជា ដែលមានអត្ថន័យដូចខាងក្រោម៖

*៣ការពារគឺ៖ ទី១-ត្រូវនាំគ្នាពាក់ម៉ាស់ឲ្យបានគ្រប់គ្នា និងគ្រប់ទីកន្លែង ជាពិសេសនៅតាមទីកន្លែងសាធារណៈ។ ទី២-ត្រូវលាងសម្អាតដៃជាមួយអាល់កុល ឬជែលជាប្រចាំ និងឲ្យបានញឹកញាប់ ជាពិសេសមុនពេល បរិភោគអាហារ និងក្រោយពេលបានប៉ះពាល់វត្ថុផ្សេងៗ។

ទី៣-ត្រូវរក្សាគម្លាតសុវត្ថិភាពបុគ្គល ដោយត្រូវនៅឃ្លាតពីគ្នាយ៉ាងតិចមួយម៉ែត្រកន្លះ។

*៣កុំមានន័យថា៖ ទី១-កុំចាប់ដៃគ្នាដោយងាកមកប្រើវប្បធម៌សំពះរបស់ខ្មែរយើងជាជំនួសវិញ។

ទី២-កុំទៅកន្លែងណា ដែលមានមនុស្សច្រើន និងទី៣-កុំនៅក្នុងបន្ទប់បិទជិត គ្មានខ្យល់ចេញចូល ជាពិសេសបន្ទប់ដែលមានម៉ាស៊ីនត្រជាក់។

*២ចូលរួម៖ ទី១-ចូលរួមក្នុងយុទ្ធនាការទទួលការចាក់វ៉ាក់ប្រឆាំងកូវីដ-១៩ និងទី២-គឺចូលរួមប្រើ QR Code stop covid ដែលជាចំណែកមួយយ៉ាងសំខាន់ក្នុងការទប់ស្កាត់ការឆ្លងរាលដាល នៃជំងឺកូវីដ-១៩ ចូលក្នុងសហគមន៍យើង។

លោកអភិបាលខណ្ឌឫស្សីកែវថា វិធានការ «៣ការពារ-៣កុំ-និង២ចូលរួម»

គឺជាអាវក្រោះដ៏មានប្រសិទ្ធភាពបំផុតសម្រាប់ការពារខ្លួនយើង,

ក្រុមគ្រួសារយើង និងសហគមន៍យើង គឺដើម្បីខ្លួនយើង,ដើម្បីគ្រួសារយើង និងដើម្បីប្រទេសជាតិយើង កុំឲ្យឆ្លងជម្ងឺកូវីដ-១៩៕

ដកស្រង់ពី៖ Fresh News