ជនជាតិអាហ្វហ្គានីស្ថាន ដណ្តើមគ្នារត់គេចពីតាលីបង់ បន្ទាប់ពីលោក Biden បញ្ជាក់ពីថ្ងៃផុតកំណត់នៃការហោះហើរ នៅថ្ងៃទី ៣១ ខែសីហា

Details

Category: International News

ជនជាតិអាហ្វហ្គានីស្ថាននៅថ្ងៃព្រហស្បតិ៍ (២៥ សីហា) នេះ ប្រញាប់ប្រញាល់រត់គេចពីការគ្រប់គ្រងរបស់តាលីបង់ ប៉ុន្តែមន្រ្តីលោកខាងលិច បាននិយាយថា ក្រុមនេះ បានធានាថា ការជម្លៀសខ្លះ នឹងត្រូវបានអនុញ្ញាត បន្ទាប់ពីថ្ងៃផុតកំណត់នៃការដកទ័ពអាមេរិក នៅសប្តាហ៍ក្រោយក៏ដោយ។

មនុស្សជាង ៨០.០០០ នាក់ ត្រូវបានគេជម្លៀសចេញ ចាប់តាំងពីថ្ងៃទី ១៤ ខែសីហា ប៉ុន្តែហ្វូងមនុស្សដ៏ច្រើន នៅតែស្ថិតនៅខាងក្រៅអាកាសយានដ្ឋានទីក្រុងកាប៊ុល ដោយសង្ឃឹមថានឹងរត់គេចពីការគំរាមកំហែងនៃការសងសឹក និងការបង្ក្រាបនៅក្នុងប្រទេសអាហ្វហ្គានីស្ថានដឹកនាំដោយតាលីបង់។

រដ្ឋមន្រ្តីក្រសួងការបរទេសអាមេរិកលោក Antony Blinken បាននិយាយកាលពីថ្ងៃពុធថា ពួកតាលីបង់ បានប្តេជ្ញាអនុញ្ញាតឱ្យមានការចាកចេញរបស់ជនជាតិអាមេរិក ប្រជាជនអាហ្វហ្កាន ដែលមានហានិភ័យ និងប្រជាជនមកពីប្រទេសផ្សេងទៀត ទោះបីជា បន្ទាប់ពីការកាត់ផ្តាច់កាលពីថ្ងៃអង្គារក៏ដោយ។

វ៉ាស៊ីនតោន និងសម្ព័ន្ធមិត្តរបស់ខ្លួន បានដឹកជនជាតិអាហ្វហ្គានីស្ថានរាប់ពាន់នាក់ ជារៀងរាល់ថ្ងៃ តាមយន្តហោះដឹកជញ្ជូនយោធាធំធំ ប៉ុន្តែវាបានក្លាយជាកិច្ចការ កាន់តែពិបាក និងអស់សង្ឃឹម។ អាកាសយានដ្ឋានរដ្ឋធានីអាហ្វហ្គានីស្ថាន ត្រូវបានកាន់កាប់ដោយភាពច្របូកច្របល់ ខណៈដែលកងទ័ពដឹកនាំដោយអាមេរិក ព្យាយាមរក្សាសន្តិសុខសុវត្ថិភាពសម្រាប់ជើងហោះហើរជម្លៀស ដែលហ៊ុំព័ទ្ធដោយជនជាតិអាហ្វហ្គានីស្ថាន ដែលអស់សង្ឃឹម។

អ្នកខ្លះ មានលិខិតឆ្លងដែនបរទេស ទិដ្ឋាការ ឬសិទ្ធិធ្វើដំណើ រប៉ុន្តែភាគច្រើន មិនមាន។ មនុស្សយ៉ាងតិច ៨ នាក់ បានស្លាប់ដោយសារភាពវឹកវរ។ ក្រុមតាលីបង់ ក៏ត្រូវបានចោទប្រកាន់ពីបទរារាំង ឬពន្យារពេលការចូលដំណើរការសម្រាប់មនុស្សជាច្រើន ដែលព្យាយាមទៅដល់អាកាសយានដ្ឋាន ទោះបីជាពួកគេ បានបដិសេធការចោទប្រកាន់នេះក៏ដោយ។

ថ្វីបើមានឈុតឆាកដ៏អាក្រក់នៅអាកាសយានដ្ឋានកាប៊ុលក៏ដោយ ក៏ពួកតាលីបង់ បានច្រានចោលការពន្យារពេលណាមួយ នៅថ្ងៃអង្គារសប្តាហ៍ក្រោយ ដើម្បីដកកងទ័ពបរទេសចេញដោយពណ៌នាថា វាជា “ខ្សែក្រហម” ។

អ្នកនាំពាក្យតាលីបង់កាលពីថ្ងៃអង្គារ បានជម្រុញជនជាតិអាហ្វហ្គានីស្ថាន ដែលមានជំនាញកុំអាយរត់គេច ដោយនិយាយថា ប្រទេសនេះ ត្រូវការ “អ្នកជំនាញ” ជនជាតិអាហ្វហ្គាន ដូចជាវេជ្ជបណ្ឌិត និងវិស្វករ នេះបើតាមការផ្សាយរបស់ CNA/AFP នៅថ្ងៃព្រហ.នេះ។