ក្នុងនាមជាក្រុមហ៊ុនផ្គត់ផ្គង់បន្ទះអេក្រង់ OLED ធំជាងគេក្នុងលោក វាគឺជារឿងធម្មតាដែល Samsung ប្រើប្រាស់អេក្រង់ OLED ផលិតដោយខ្លួនឯង សម្រាប់ស្មាតហ្វូនរបស់ខ្លួន។
ប៉ុន្តែវាអាចនឹងប្រែប្រួលក្នុងពេលអនាគត។ នេះបើផ្អែកតាមក្រុមហ៊ុនវិភាគ DSCC។DSCC និយាយថា Samsung កំពុងពិភាក្សាជាមួយក្រុមហ៊ុនចិន BOE ឲ្យផលិតអេក្រង់ OLED ខ្លះៗសម្រាប់ស្មាតហ្វូនត្រកូល Galaxy នាពេលអនាគត។
Samsung ចង់ឲ្យ BOE ផ្គត់ផ្គង់បន្ទះអេក្រង់ទំហំ ៦,៦៧អ៊ីញ សម្រាប់ត្រកូល Galaxy S21 ឬ Galaxy S30 យ៉ាងតិចមួយម៉ូដែលដែលចេញឆ្នាំក្រោយ។
Galaxy A91 ដែលរៀបនឹងប្រកាសចេញក៏នឹងប្រើប្រាស់អេក្រង់ OLED ទំហំ ៦,៦៧អ៊ីញ ផលិតដោយ BOE ដែរ។ វាជារឿងគួរឲ្យចាប់អារម្មណ៍មួយ ដោយសារ BOE បច្ចុប្បន្ននេះគឺជាក្រុមហ៊ុនផ្គត់ផ្គង់អេក្រង់ LCD ធំជាងគេក្នុងលោក ប៉ុន្តែចំណែកទីផ្សារ OLED របស់ក្រុមហ៊ុននេះគឺស្ថិតនៅលំដាប់លេខ ៣ ប៉ុណ្ណោះ នៅពីក្រោយ Samsung និង LG។ មើលទៅការព្យាករណ៍ថា Samsung បាត់បង់ចំណែកទីផ្សារអេក្រង់ OLED ចំនួន ១១% នៅត្រីមាសទី ៤ ឆ្នាំ ២០២០ នេះ ទំនងក្លាយជាការពិត ដោយសារ Apple ក៏កំពុងស្វែងរកអ្នកជំនួសអាច Samsung ហើយ Apple ទំនងជារក BOE ឲ្យជួយក្នុងការផលិតអេក្រង់ OLED សម្រាប់ iPhone 12 ផងដែរ។
ការស្វែងរក BOE ជាដៃគូផ្គត់ផ្គង់អេក្រង់ OLED របស់ Samsung នេះ អាចដោយសារក្រុមហ៊ុនចង់ការបន្ថយការចំណាយលើថ្លៃផលិតសម្រាប់ស្មាតហ្វូនធន់កណ្ដាល និង Flagship តម្លៃធូរ ហើយក៏អាចដោយសារតែក្រុមហ៊ុនចង់ប្រើប្រាស់ធនធានសម្រាប់ផ្ដោតលើអេក្រង់ OLED អាចបត់បានចាប់ពីពេលនេះ៕
ដកស្រង់ពី៖sabay