Honda Click ទើបចេញម៉ូឌែលម៉ាស៊ីន160cc ជាមួយរូបរាងថ្មីទាំងស្រុង ខុសពីពាក្យចចាអារ៉ាម

Details

Category: Other News

កន្លងទៅយើងធ្លាប់បានលឺព័ត៌មាន ពីប្រទេសឥណ្ឌូណេស៊ីថា Honda នឹងបញ្ចេញម៉ូតូអូតូ Vario (Click) ម៉ូឌែលម៉ាស៊ីន 160cc ថ្មី ដែលកំពុងប្រើនៅលើ Honda PCX ដោយរក្សារូបរាងដដែល ដូចនឹង Click 150cc។

ស្រាប់តែព្រឹកថ្ងៃទី០២ ខែកុម្ភៈ ឆ្នាំ២០២២នេះ Click 160cc ត្រូវបានប្រកាសចេញជាផ្លូវការ ជាមួយនូវរូបរាងថ្មីទាំងស្រុង និងបច្ចេកវិទ្យាថ្មីផងដែរ។ម៉ាស៊ីនរបស់វាមានទំហំស៊ីឡាំងធំជាងមុន សរុប 160cc ប្រភេទ៤វ៉ាល់ បង្កើតកម្លាំងសរុបបាន ១៥.១៥សេះ មានកម្រិតស៊ីសាំង 46.9 km / l ជាម៉ាស៊ីនតែមួយ ដែលកំពុងប្រើលើ PCX 160នោះដែរ។

មិនត្រឹមតែម៉ាស៊ីនដូចនឹង PCX ឡើយ គ្រប់បច្ចេកវិទ្យាសុវត្ថិភាពរបស់វា ក៏មានដូចគ្នាដែរ ពោលគឺបច្ចេកវិទ្យា HSTC (ប្រព័ន្ទគ្រប់គ្រងរង្វិលកង់មិនឲ្យទួង), ប្រព័ន្ធហ្វ្រាំង ABS នៅកង់មុខ និងបន្ថែមពីលើនោះគឺប្រព័ន្ធគ្រោងឆ្អឹងថ្មី eSAF។ចំណែករូបរាងខាងក្រៅវិញ មានការឌីហ្សាញថ្មីទាំងស្រុង ស្រដៀងនឹង Honda Airblade ដែលកំពុងលក់លើទីផ្សារប្រទេសវៀតណាមដែរ ដោយមើលតាមរូបរាងក្នុងរូបថត អ្នកធម្មតាប្រហែលជាមិនអាចបែងចែកមួយណាជា Airblade ឬ Click ឡើយ។

រីឯប្រអប់ដាក់ឥវ៉ាន់ ជិតដៃចង្កូតវិញ វាមានបំពាក់មកដោយរន្ធសាកថ្មទូរសព្ទផងដែរ ដែលមិនធ្លាប់មានឡើយនៅលើត្រកូល Click មួយនេះ។សម្រាប់តម្លៃលក់ និងថ្ងៃចេញលើទីផ្សារ ក្រុមហ៊ុនមិនទាន់បានប្រកាសនៅឡើយទេ ហើយយើងសង្ឃឹមថានឹងបានឃើញវាឆាប់ៗនេះ នៅក្នុងប្រទេសយើង៕

ដកស្រង់ពី៖sabay