​ក្រសួង​ទេសចរណ៍​នឹង​រៀបចំ​មហោស្រព​តន្ត្រី​អូ​ប៉េ​រ៉ា​ ​ដោយ​បង្ហាញ​នូវ​សំឡេង​ពីរោះ​បំផុត​លើ​លោក​

Details

Category: ព័ត៌មានទេសចរណ៍

ក្នុងការជំរុញដល់ឧស្សាហកម្មទេសចរណ៍ដែលងើបឡើងវិញនៅក្នុងព្រះរាជាណាចក្រកម្ពុជា ក្រុមការងាររបស់ Andrea Bocelli អ៊ីតាលីដ៏ល្បីល្បាញលើពិភពលោក បានជួបពិភាក្សាជាមួយមន្ត្រីនៃក្រសួងទេសចរណ៍។ ក្រុមការងារដឹកនាំដោយលោក Marco Bianchi ដែលជាអ្នកគ្រប់គ្រងការប្រគុំតន្ត្រីរបស់ Bocelli បានជួបជាមួយលោក សុខ សូកេន រដ្ឋមន្ត្រីក្រសួងទេសចរណ៍ នៅទីស្តីការក្រសួងក្នុងរាជធានីភ្នំពេញកាលពីថ្ងៃចន្ទ។ Bocelli ត្រូវបានផលិតករល្បីឈ្មោះម្នាក់ពណ៌នាថាជាសំឡេងដែលពីរោះបំផុតលើលោក។

ជំនួបពិភាក្សានេះត្រូវបានធ្វើឡើងដើម្បីពិភាក្សាពីលទ្ធភាពដែលកម្ពុជារៀបចំមហោស្រពតន្ត្រីអូប៉េរ៉ានៅខេត្តសៀមរាបនៅឆ្នាំក្រោយ ដែលជាផ្នែកនៃយុទ្ធនាការទស្សនាខេត្តសៀមរាបឆ្នាំ២០២៤ ដោយក្រសួង។ កម្មវិធីមហោស្រពតន្រ្តី អូប៉េរ៉ា ស្តារធួរ (Opera Star Tour) ត្រូវបានរៀបចំឡើងនៅទីតាំងដ៏អស្ចារ្យជាច្រើនជុំវិញពិភពលោក ដែលសាកសមនឹងក្រុងអង្គរ។

David-Jaya Piot ប្រធានសមាគមសណ្ឋាគារកម្ពុជា និង Siem Reap Chapter បានប្រាប់កាសែតខ្មែរថាមស៍ កាលពីថ្ងៃអង្គារថា តន្រ្តីអូប៉េរ៉ា គឺជាទម្រង់សិល្បៈមួយ ដែលជារឿយៗត្រូវបានផ្សារភ្ជាប់ជាមួយនឹងសង្គមវណ្ណៈខ្ពស់អន្តរជាតិ។ ការទទួលរៀបចំតារាសម្តែងតន្រ្តីអូប៉េរ៉ាដូចជា Andrea Bocelli នៅកន្លែងដ៏អស្ចារ្យ ដូចប្រទេសកម្ពុជា ពិតជាព្រឹត្តិការណ៍គួរឱ្យកត់សម្គាល់នៅលើឆាកអន្តរជាតិ និងផ្សព្វផ្សាយប្រទេសកម្ពុជាជាគោលដៅវប្បធម៌កម្រិតខ្ពស់។

ការធ្វើជាម្ចាស់ផ្ទះរៀបចំការសម្តែងលក្ខណៈអន្តរជាតិដែលបង្ហាញពីភាពស្រស់ស្អាតរបស់ប្រទេសកម្ពុជា ប្រាកដជាទាក់ទាញអ្នកដែលផ្តល់តម្លៃលើតន្ត្រីនេះ។ ការរួមបញ្ចូលអត្ថន័យវប្បធម៌ខ្មែរដោយជោគជ័យជាមួយនឹងទម្រង់សិល្បៈអន្តរជាតិ គឺជាមធ្យោបាយមួយសម្រាប់កម្ពុជាក្នុងការធ្វើឱ្យមានភាពលេចធ្លោនៅលើឆាកសិល្បៈសកលលោក។

ភ្ញៀវដែលចូលរួមក្នុងមហោស្រពបែបនេះ ត្រូវការនូវកន្លែងស្នាក់នៅ ម្ហូបអាហារ ការដឹកជញ្ជូន និងសេវាកម្មផ្សេងៗទៀត ដែលនាំឱ្យកំណើនអាជីវកម្មសម្រាប់សណ្ឋាគារ ភោជនីយដ្ឋាន និងអ្នកលក់ក្នុងស្រុក នេះបើតាមJeremie Clement នាយកគ្រប់គ្រងទូទៅនៃ Peninsula Phnom Penh។ ជាងនេះទៅទៀត ព្រឹត្តិការណ៍វប្បធម៌ទាំងនេះ នឹងបង្កើតឱកាសការងារសម្រាប់អ្នកស្រុក ទាំងដោយផ្ទាល់ក្នុងវិស័យទេសចរណ៍ និងដោយប្រយោលនៅក្នុងឧស្សាហកម្មពាក់ព័ន្ធ។

លើសពីនេះ ព្រឹត្តិការណ៍ទាំងនេះអាចជួយធ្វើពិពិធកម្មការផ្តល់សេវាទេសចរណ៍របស់កម្ពុជា ដោយធ្វើឱ្យប្រទេសកម្ពុជាក្លាយជាគោលដៅទាក់ទាញបន្ថែមទៀតសម្រាប់ភ្ញៀវទេសចរដែលចាប់អារម្មណ៍លើបទពិសោធន៍វប្បធម៌ និងសិល្បៈ ក្រៅពីទស្សនារមណីយដ្ឋានប្រវត្តិសាស្ត្រដូចជាប្រាសាទអង្គរវត្ត។

កិច្ចសហការរវាងសិល្បករអន្តរជាតិ និងអ្នករៀបចំក្នុងស្រុក នឹងជួយអភិរក្ស និងធ្វើឱ្យទម្រង់សិល្បៈបុរាណខ្មែររស់ឡើងវិញ ដោយធានាថាពួកគេនៅតែពាក់ព័ន្ធ និងត្រូវបានផ្តល់តម្លៃក្នុងបរិបទទំនើប។

Catherine Germier-Hamel នាយកប្រតិបត្តិ និងជាស្ថាបនិកនៃ Millennium Destinations មានប្រសាសន៍ថា ការធ្វើជាម្ចាស់ផ្ទះព្រឹត្តិការណ៍តន្ត្រីលំដាប់ថ្នាក់ពិភពលោកអាចជាឧបករណ៍ដ៏មានឥទ្ធិពលមួយសម្រាប់ប្រទេសកម្ពុជា។ ព្រឹត្តិការណ៍ទាំងនេះអាចទាក់ទាញទស្សនិកជនអន្តរជាតិ ដោយជំរុញការផ្លាស់ប្តូរវប្បធម៌ និងលើកកម្ពស់មុខមាត់របស់ប្រទេស។ ដើម្បីទាញយកនូវសក្តានុពលនេះ សិល្បករខ្មែរគួរតែត្រូវបានបង្ហាញទេពកោសល្យក្នុងស្រុកដ៏លេចធ្លោជាមួយតារាអន្តរជាតិ។ ការអភិវឌ្ឍន៍ទីកន្លែងល្បីៗ ទាំងប្រពៃណី និងទំនើប នឹងជួយបង្កើនបទពិសោធន៍ និងពង្រឹងជំហររបស់ប្រទេសកម្ពុជាជាគោលដៅវប្បធម៌ដ៏គួរឱ្យទាក់ទាញ។

Clemy Balasoto នាយកទីផ្សារផ្នែកលក់ Tripoflight មានប្រសាសន៍ថា តាមរយៈការបង្ហាញនូវការសម្តែងចម្រុះ រួមទាំងរបាំប្រពៃណី ដូចជារបាំអប្សរា និងទម្រង់នៃការបង្ហាញពីសិល្បៈសំខាន់ៗផ្សេងទៀត កម្ពុជាអាចផ្តល់ឱ្យអ្នកទស្សនានូវការយល់ដឹងយ៉ាងស៊ីជម្រៅអំពីបេតិកភណ្ឌវប្បធម៌ដ៏សម្បូរបែប និងរស់រវើករបស់កម្ពុជា។ បទពិសោធន៍ដ៏សម្បូរបែបនេះ មិនត្រឹមតែអាចឱ្យភ្ញៀវទេសចរពេញកោតសរសើរចំពោះលក្ខណៈពិសេសនៃប្រពៃណីខ្មែរប៉ុណ្ណោះទេ ប៉ុន្តែថែមទាំងជំរុញឱ្យមានទំនាក់ទំនង និងការផ្លាស់ប្តូរវប្បធម៌ផងដែរ។

កាលពីខែមីនា ដើមឆ្នាំនេះ Bocelli បានទាក់ទាញចំណាប់អារម្មណ៍ជាអន្តរជាតិក្នុងអំឡុងពេលពិធីប្រគល់ពានរង្វាន់ Oscar លើកទី៩៦ នៅពេលដែលគាត់បានសម្តែងបទចម្រៀងរួមគ្នាជាមួយកូនប្រុសរបស់គាត់ Matteo នូវបទ “Time to Say Goodbye” សម្រាប់ផ្នែក In Memoriam ។ ភាពពិការភ្នែកត្រូវបានអត្ថាធិប្បាយទឹកដមសំនៀងដ៏ល្បីល្បាញដោយតារា Celine Dion ថា “ប្រសិនបើព្រះអាចច្រៀងបាន នោះនឹងមានសម្លេងដូច Andrea Bocelli” ។ ផលិតករល្បីឈ្មោះ David Foster ជារឿយៗបានហៅសម្លេងរបស់គាត់ថាពិរោះបំផុតលើលោក។

ដកស្រង់ពី៖ ខ្មែរថាមស៍