ទាហានអាហ្វហ្គានីស្ថាន ស្វែងរកការលើកលែងទោសតាលីបង់បន្ទាប់ពីការដួលរលំទីក្រុង Herat

សេចក្ដីលម្អិត

ជំពូក៖ ព័ត៌មានអន្តរជាតិ

ទាហានអាហ្វហ្គានីស្ថានរាប់ពាន់នាក់ បានប្រមូលផ្តុំគ្នានៅការិយាល័យអភិបាលក្រុង Herat ភាគខាងលិច ដើម្បីស្វែងរកពួកតាលីបង់ មិនមែនដើម្បីប្រយុទ្ធជាមួយពួកគេទេ ប៉ុន្តែដើម្បីស្វែងរកការលើកលែងទោស។

ទីក្រុងធំបំផុតទីបីរបស់ប្រទេសអាហ្វហ្គានីស្ថាន បានដួលរលំដោយគ្មានការប្រយុទ្ធគ្នា កាលពីថ្ងៃព្រហស្បតិ៍ (10 មីនា) នៅពេលដែលកងកម្លាំងរដ្ឋាភិបាល បានដកថយ ហើយស្តេចសង្រ្គាមដ៏ល្បីល្បាញរបស់ក្រុង Herat គឺ Ismail Khan ត្រូវបានចាប់ខ្លួនដោយពួកបះបោរ។

ជាមួយនឹងការភ័យខ្លាចនៃការសងសឹកដោយហិង្សាកើនឡើង នៅពេលដែលពួកតាលីបង់ ខិតកាន់តែជិតដល់ការដណ្តើមកាន់កាប់ប្រទេសទាំងស្រុង ទាហានអាហ្វហ្គានីស្ថាននៅទីក្រុង Herat ដែលពួកគេស្ទើរតែទាំងអស់ក្នុងសម្លៀកបំពាក់ស៊ីវិល បានប្រមូលផ្តុំគ្នាកាលពីថ្ងៃសៅរ៍ដើម្បីព្យាយាមទទួលបានលិខិតលើកលែងទោស។

នៅខាងក្នុងការិយាល័យ ដែលធ្លាប់ជារបស់អភិបាលក្រុង Herat សមាជិកក្រុមតាលីបង់បានអង្គុយលើកៅអីអង្គុយ - ខ្លះកាន់កាំភ្លើងយោធាអាមេរិក ខណៈដែលពួកគេសរសេរឈ្មោះ និងពិនិត្យបញ្ជីរាយប៉ាយនៅលើតុកាហ្វេ ដែលមានកញ្ចក់។

នៅលើក្រដាស ដែលមានក្បាលសំបុត្រតាលីបង់ មនុស្សម្នាក់ បានសរសេរលិខិតលើកលែងទោស - ខ្លះរយៈពេលវែង ខ្លះមានសុពលភាពត្រឹមតែពីរ-បីថ្ងៃប៉ុណ្ណោះ។ ទាហានអាហ្វហ្គានីស្ថានម្នាក់នៅអគារនោះ បានប្រាប់ AFP ថា អង្គភាពខ្លួន ត្រូវបានឡោមព័ទ្ធដោយពួកតាលីបង់ មុនពេលការដួលរលំទីក្រុង។

ហើយឥឡូវនេះ ខ្លួន គ្រាន់តែចង់បានសន្តិសុខប៉ុណ្ណោះ ដោយមកយកសំបុត្រលើកលែងទោស ដើម្បីចាកចេញពីទីក្រុង។ សមាជិកក្រុមតាលីបង់ បាននិយាយថា មនុស្សប្រហែល 3,000 នាក់ត្រូវបានលើកលែងទោស។ “អ្នក ដែលមកពីខេត្តផ្សេងៗ នឹងត្រូវបានផ្តល់លិខិតលើកលែងទោសបណ្តោះអាសន្នរយៈពេលបីថ្ងៃ ដូច្នេះពួកគេ អាចទៅខេត្តកំណើតរបស់ពួកគេ ទីដែលពួកគេ ត្រូវការទទួលបានលិខិតលើកលែងទោសរយៈពេលវែងមួយទៀត ពីមន្ត្រីរបស់តាលីបង់។

នៅក្នុងម្លប់នៃទីធ្លាក្នុងបរិវេណនោះ មនុស្សរាប់រយនាក់ បានអង្គុយដោយអត់ធ្មត់ ខណៈដែលបុរសម្នាក់ កាន់ប័ណ្ណលើកលែងទោស បានស្រែកហៅឈ្មោះម្តងមួយៗ ដើម្បីឱ្យពួកគេ មកយកនេះបើតាមការផ្សាយរបស់ CNA សឹង្ហបុរី ដោយដកស្រង់ពីសារព័ត៌មាន AFP កាលពីយប់ថ្ងៃ អាទិត្យ។