(សេអ៊ូល)៖ រដ្ឋាភិបាលទីក្រុងសេអ៊ូល បានប្រកាសប្តេជ្ញាចិត្ត យ៉ាងម៉ឺងម៉ាត់ នៅថ្ងៃពុធនេះថា ខ្លួននឹង ចាត់រាល់វិធានការ ឆ្លើយតបគ្រប់រូបភាពទាំងអស់ បើសិនជាជប៉ុន នៅបន្តធ្វើឲ្យទំនាក់ទំនងពាណិជ្ជកម្ម រវាងប្រទេសទាំងពីរ កាន់តែអាក្រក់ឡើង តាមរយៈការដាក់កំហិត បន្ថែមលើការនាំចេញ។
នេះបើតាមការចេញផ្សាយដោយ ទីភា្នក់ងារសារព័ត៌មាន ចិនស៊ីនហួរ នៅថ្ងៃពុធ ទី៣១ ខែកក្កដា ឆ្នាំ២០១៩។ ការប្តេជ្ញាចិត្តយ៉ាងម៉ឺងម៉ាត់ ខាងលើ ធ្វើឡើងកំឡុងប្រជុំ សមាជិកគណៈកម្មាធិការអចិន្ត្រៃយ៍នៃ ក្រុមប្រឹក្សាសន្តិសុខ ជាតិកូរ៉េខាងត្បូង ដែលដឹកនាំដោយ លោក Chung Eui-yong ដែលជានាយក ទីប្រឹក្សាសន្តិសុខជាតិ របស់ប្រធានាធិបតីកូរ៉េខាងត្បូង នាព្រឹកថ្ងៃពុធនេះ។
គួរបញ្ជាក់ថា កិច្ចប្រជុំនេះ បានធ្វើឡើងបន្ទាប់ពីប្រទេសជប៉ុន បានដាក់ចេញនូវការដាក់កំហិត កាលពីដើមខែកក្កដាកន្លងទៅ លើការនាំចេញ វត្ថុធាតុដើមចំនួន ០៣ប្រភេទ ដែលមានសារៈសំខាន់ បំផុត ក្នុងការផលិតបន្ទះឈីប និងអេក្រង់ទូរស័ព្ទ ដៃស្មាតហ្វូន ដល់ក្រុមហ៊ុនបច្ចេកវិទ្យា កូរ៉េខាងត្បូង។
ដោយឡែក បើតាមសារព័ត៌មានក្នុងស្រុកមួយ រដ្ឋមន្រ្តីក្រសួងការបរទេសកូរ៉េខាងត្បូង គឺលោកស្រី Kang Kyung-wha គ្រោងនឹងជួបចរចាមួយទល់មួយ ជាមួយសមភាគីជប៉ុន លោក Taro Kono នាឱកាសចូលរួមវេទិកា តំបន់អាស៊ាន (ARF) នៅទីក្រុងបាងកក ប្រទេសថៃ នៅចុងសប្តាហ៍នេះ៕
ដកស្រង់ពី៖ Fresh News