ឆ្នាំបោះឆ្នោតនៅអាឡឺម៉ង់ ចាប់ផ្តើមជាមួយនឹងការសាកល្បងដ៏តឹងរឹងសម្រាប់គណបក្សរបស់លោកស្រី Merkel

សេចក្ដីលម្អិត

ជំពូក៖ ព័ត៌មានអន្តរជាតិ

ការបោះឆ្នោតនៅក្នុងរដ្ឋពីរនៃប្រទេសអាឡឺម៉ង់ កាលពីថ្ងៃអាទិត្យ ចោទជាតេស្តិដ៏លំបាកមួយសម្រាប់គណបក្សរបស់អធិការបតី Angela Merkel ដែលមានរយៈពេល ៦ ខែ មុនការបោះឆ្នោតជាតិ ដែលនឹងកំណត់ថាតើអ្នកណា នឹងទទួលបានជោគជ័យលើមេដឹកនាំដ៏យូរអង្វែងរបស់ប្រទេសមួយនេះ។

អ្នកបោះឆ្នោតកំពុងជ្រើសរើសអង្គនីតិប្បញ្ញត្តិតំបន់ថ្មី នៅរដ្ឋ Baden-Wuerttemberg ដែលជាតំបន់មហាអំណាចសេដ្ឋកិច្ចមួយ នៅភាគនិរតីប្រទេសអាល្លឺម៉ង់ និងរដ្ឋជិតខាង Rhineland-Palatinate ។

សន្លឹកឆ្នោតទាំងនោះ បានចាប់ផ្តើមដំណើរការប្រណាំងប្រជែងបោះឆ្នោត នៅឆ្នាំនេះ ដែលមានការបោះឆ្នោតរដ្ឋចំនួន ៦ និងឈានដល់ការបញ្ចប់ការបោះឆ្នោតនៅថ្ងៃទី ២៦ ខែកញ្ញា សម្រាប់សភាជាតិថ្មី។

ការស្ទង់មតិ ចង្អុលបង្ហាញអំពីលទ្ធផលខ្សោយសម្រាប់គណបក្សសហភាពប្រជាធិបតេយ្យគ្រឹស្តិនិយមស្តាំ (CDU) របស់លោកស្រី Merkel ដោយសារការមិនសប្បាយចិត្ត ចំពោះការចាប់ផ្តើមយឺតនៃយន្តការចាក់វ៉ាក់សាំងរបស់អាឡឺម៉ង់ ហើយនឹងវិធានការរឹតត្បិតជំងឺឆ្លងនេះ មានការធូរស្បើយបន្តិចម្តងៗពេក។

ប្លុកសហជីពរបស់លោកស្រីអធិការបតី Merkel បានរងផលប៉ះពាល់ក្នុងរយៈពេលពីរសប្តាហ៍កន្លងមកនេះ ដោយការចោទប្រកាន់ថា សមាជិកសភាពីររូប ទទួលបានផលប្រយោជន៍ពីកិច្ចព្រមព្រៀង ដើម្បីទទួលបានម៉ាសមុខ កាលពីដំណាក់កាលដំបូងនៃជំងឺរាតត្បាត។

គណបក្ស CDU បានប្រឈមមុខនឹងភារកិច្ចដ៏លំបាកមួយ ចំពោះតំណែងអភិបាលរដ្ឋ ដ៏មានប្រជាប្រិយភាពពីរ ពីគណបក្សគូប្រជែង។ នោះ គឺជាសញ្ញាសង្ឃឹមមួយ សម្រាប់យុទ្ធនាការបោះឆ្នោតជាតិ ដែលក្នុងនោះគណបក្សអ្នកបរិស្ថានទំនោរឆ្វេងនិយម ត្រូវបានគេរំពឹងថា នឹងទទួលបានជាលើកដំបូងសម្រាប់តំណែងអធិការបតី។

លោកស្រី Merkel មិនអាចស្វែងរកអាណត្តិទី ៥ បានទេ បន្ទាប់ពីកាន់អំណាចជិត ១៦ ឆ្នាំមកនេះ នេះបើតាមការផ្សាយរបស់ CNA/AP កាលពីថ្ងៃអាទិត្យ។