សភាប្រទេសឡាវ ជ្រើសរើសលោក Thongloun ជាប្រធានាធិបតីថ្មី

សេចក្ដីលម្អិត

ជំពូក៖ ព័ត៌មានអន្តរជាតិ

សម័យប្រជុំបើកជាផ្លូវការនីតិកាលទី ៩ នៃរដ្ឋសភាឡាវ កាលពីព្រឹកថ្ងៃច័ន្ទ បានបោះឆ្នោតជ្រើសរើសលោក Thongloun Sisoulith អគ្គលេខាធិការគណៈកម្មាធិការកណ្តាលគណបក្សប្រជាជនបដិវត្តឡាវ ជាប្រធានាធិបតីថ្មីរបស់ប្រទេសមួយនេះ ជំនួសលោក Bounnhang Vorachit ។

បន្ទាប់ពីឡើងកាន់តំណែងជាប្រធានាធិបតីលោក Thongloun បានប្តេជ្ញាថា នឹងធ្វើការយ៉ាងសកម្មជាមួយគណបក្ស មេដឹកនាំរដ្ឋ និងប្រជាជនឡាវ ដើម្បីបង្កើតលក្ខខណ្ឌអំណោយផលសម្រាប់ស្ថេរភាពកំណើនសេដ្ឋកិច្ចជាតិ និងការកាត់បន្ថយភាពក្រីក្រនៅក្នុងប្រទេស។

លោក ក៏បានសន្យាគោរពរដ្ឋធម្មនុញ្ញ និងច្បាប់នានា ក៏ដូចជាការពារផលប្រយោជន៍ស្របច្បាប់របស់ប្រជាជនឡាវ។ សម័យប្រជុំសម្ពោធ ធ្វើឡើងនៅរដ្ឋធានីវៀងចន្ទន៍របស់ឡាវ ក៏បានបោះឆ្នោតជ្រើសរើសលោក Phankham Viphavanh ជាសមាជិកការិយាល័យនយោបាយនៃគណៈកម្មាធិការកណ្តាល គណបក្សប្រជាជនបដិវត្តឡាវ ដើម្បីធ្វើជានាយករដ្ឋមន្ត្រីឡាវ នេះបើតាមការផ្សាយរបស់ស៊ិនហួរ-ចិន កាលពីថ្ងៃចន្ទ។