ទួគី ចេញដីកាចាប់ខ្លួនសម្រាប់បុគ្គលិកយោធាជាង ៥០០ នាក់ជុំវិញការធ្វើរដ្ឋប្រហារមិនបានសម្រេច

សេចក្ដីលម្អិត

ជំពូក៖ ព័ត៌មានអន្តរជាតិ

ព្រះរដ្ឋអាជ្ញាទួគី បានចេញដីកាសម្រេចឃុំខ្លួនបុគ្គលិកយោធាចំនួន ៥៣២ នាក់ ពីបទមានទំនាក់ទំនងទៅនឹងបណ្តាញ ដែលត្រូវបានចោទប្រកាន់រៀបចំការប៉ុនប៉ងធ្វើរដ្ឋប្រហារ ក្នុងឆ្នាំ ២០១៦ ។

បើតាមទីភ្នាក់ងារ Anadolu ដែលគ្រប់គ្រងដោយរដ្ឋ បាននិយាយថា អង្គភាពប៉ូលីស បានបើកប្រតិបត្តិការនៅក្នុងខេត្តចំនួន ៦២ ដែលជាផ្នែកមួយនៃការស៊ើបអង្កេត ដឹកនាំដោយព្រះរដ្ឋអាជ្ញាប្រចាំទីក្រុង Istanbul និង Izmir ។

ព្រះរដ្ឋអាជ្ញា បានសន្និដ្ឋានថា ជនសង្ស័យមានទំនាក់ទំនងជាមួយបណ្តាញដែលដឹកនាំដោយបព្វជិតទួគី ដែលមានមូលដ្ឋាននៅសហរដ្ឋអាមេរិក គឺលោក Fethullah Gulen ។

បុគ្គល ដែលត្រូវបានកំណត់គោលដៅក្នុងប្រតិបត្តិការនោះ រួមមានទាហាន ៤៥៩ នាក់ ដែលមានភារកិច្ច និងនិស្សិតសាលាយោធា ដែលត្រូវបានបណ្តេញចេញ។ រដ្ឋាភិបាលទួគី បានដាក់ការបន្ទោសលើលោក Gulen និងបណ្តាញរបស់លោក ដែលបានធ្វើជាមេក្លោងក្នុងការរៀបចំផែនការធ្វើរដ្ឋប្រហារ កាលពីខែកក្កដាឆ្នាំ ២០១៦ ដែលក្នុងនោះមនុស្ស ២៥០ នាក់ ត្រូវបានសម្លាប់ នេះបើតាមការផ្សាយរបស់ស៊ិនហួរ-ចិន កាលពីថ្ងៃអង្គារ-ម្សិលមិញ។