អន្តរជាតិតុលាការហូឡង់ បញ្ជាឱ្យក្រុមហ៊ុនប្រេង Royal Dutch Shell កាត់បន្ថយការបញ្ចេញឧស្ម័នកាបូន

សេចក្ដីលម្អិត

ជំពូក៖ ព័ត៌មានអន្តរជាតិ

 នៅថ្ងៃទី២៦ ខែឧសភា តុលាការហូឡង់ចេញបញ្ជាឱ្យក្រុមហ៊ុនប្រេងឥន្ធនៈ Royal Dutch Shell កាត់បន្ថយការបំភាយឧស្ម័នកាបូនរបស់ខ្លួនចំនួន៤៥ភាគរយត្រឹមឆ្នាំ២០៣០ ធៀបនឹងកម្រិតនៅឆ្នាំ២០១៩។

សេចក្ដីសម្រេចដ៏សំខាន់នេះ នឹងក្លាយជាគំរូផ្នែកច្បាប់សម្រាប់ប្រទេសឯទៀតក្នុងការចាត់វិធានការប្រឆាំងក្រុមហ៊ុនថាមពលជុំវិញពិភពលោក។បណ្ដឹងប្រឆាំងក្រុមហ៊ុនប្រេងដ៏ធំ Royal Dutch Shell ត្រូវបានផ្ដួចផ្ដើមដោយក្រុមសកម្មជនតស៊ូមតិលើបម្រែបម្រួលលអាកាសធាតុ។

នេះបើតាមការផ្សាយរបស់ទីភ្នាក់ងារព័ត៌មាន AP ។ ក្នុងសវនាការថ្ងៃទី២៦ ខែឧសភា តុលាការប្រចាំទីក្រុងឡាអេ បានបញ្ជាក់ក្នុងសាលក្រមរបស់ខ្លួនថា ក្រុមហ៊ុនថាមពលខ្នាតយក្សមួយនេះ ត្រូវតែមានកាតព្វកិច្ចកាត់បន្ថយការបញ្ចេញឧស្ម័នបំពុលចំនួន៤៥ភាគរយនៅឆ្នាំ២០៣០។

បើតាមតុលាការ ផែនការកាត់បន្ថយឧស្ម័នបំពុលរបស់ក្រុមហ៊ុនបច្ចុប្បន្នពុំទាន់រឹងមាំនៅឡើយ។ ក្នុងសាលក្រមដដែល តុលាការហូឡង់ បញ្ជាក់ថា ក្រុមហ៊ុន Shell មិនទាន់បំពានកាតព្វកិច្ចរបស់ខ្លួនក្នុងការកាត់បន្ថយការបញ្ចេញឧស្ម័នពុលរបស់ខ្លួនដូចការអះអាងរបស់ក្រុមការពារបរិស្ថានឡើយ ព្រោះក្រុមហ៊ុនមេ បានពង្រឹងគោលនយោបាយរបស់ខ្លួន។

ប៉ុន្តែតុលាការរកឃើញថា គោលនយោបាយរបស់ក្រុមហ៊ុន មិនទាន់ជាក់លាក់ មានចំណុចខ្វះខាត និងពឹងផ្អែកលើការអភិវឌ្ឍសង្គមជាជាងការទទួលខុសត្រូវរបស់ក្រុមហ៊ុនលើការកាត់បន្ថយឧស្ម័នកាបូន។

នាយកប្រតិបត្តិក្រុមហ៊ុន Shell លោក Ben Van Beurden បានច្រានចោលបរិមាណដែលកំណត់ដោយតុលាការ។ ក្រុមហ៊ុន ក៏នឹងប្តឹងឧទ្ធរណ៍ចំពោះសាលក្រមរបស់តុលាការនេះដែរ។ កាលពីដើមឆ្នាំនេះ ក្រុមហ៊ុន Shell បានដាក់ចេញនូវយុទ្ធសាស្រ្តអាកាសធាតុមួយដោយមានគោបំណងកាត់បន្ថយកាបូនពីការថាមពលយ៉ាងតិច៦ភាគរយនៅត្រឹមឆ្នាំ២០២៣, ២០ភាគរយនៅឆ្នាំ២០៣០ និង១០០ភាគរយនៅឆ្នាំ២០៥០។

ទោះជាយ៉ាងណាគោលនយោបាយនេះត្រូវបានគេមើលថាមិនទាន់មានភាពប្រសិទ្ធភាពនូវឡើយ។ អង្គការបរិស្ថាន និងសិទ្ធមនុស្សចំនួន៧ក្រុម ក៏ដូចជាប្រជាពលរដ្ឋហូឡង់ប្រមាណ១៧០០នាក់ បានដាក់ពាក្យបណ្តឹងទៅតុលាការនៅឆ្នាំ២០១៨ ដោយស្នើឱ្យតុលាបញ្ជាឱ្យក្រុមហ៊ុន Shell កាត់បន្ថយការបំភាយឧស្ម័នស្របតាមគោលដៅពិភពលោកដែលបានចែងនៅក្នុងកិច្ចព្រមព្រៀងនៃអាកាសធាតុទីក្រុងប៉ារីស៕

ដកស្រង់ពី៖ ថ្មីៗ