ប៉ូលិសហុងកុងចុះចាប់ខ្លួនថ្នាក់ដឹកនាំកំពូលៗ នៃសារព័ត៌មាន Apple Daily សរុបចំនួន៥នាក់ ​(Video inside)

សេចក្ដីលម្អិត

ជំពូក៖ ព័ត៌មានអន្តរជាតិ

(ហុងកុង)៖ ប៉ូលីសហុងកុងបានចាប់ខ្លួននាយកសារព័ត៌មាន Apple Daily ចំនួន ០៥នាក់ ក្នុងនោះរួមទាំងនិពន្ធនាយកផងដែរ នៅព្រឹកថ្ងៃព្រហស្បតិ៍ ទី១៧ ខែមិថុនា ឆ្នាំ២០២១។

នេះបើតាមការចេញផ្សាយ ដោយសារព័ត៌មាន AFP។ កងកម្លាំងប៉ូលិស នៃនាយកដ្ឋានសន្តិសុខជាតិហុងកុង បានគូសបញ្ជាក់នៅក្នុងសេចក្តីថ្លែងការណ៍មួយថា នាយកក្រុមហ៊ុនសារព័ត៌មាន Apple Daily ចំនួន ០៥នាក់ត្រូវបានចាប់ខ្លួនពីបទសង្ស័យថា បានគប់គិតគ្នាជាមួយកម្លាំងបរទេស ដែលអាចបង្កគ្រោះថ្នាក់ដល់សន្តិសុខជាតិ។

អ្នកទាំង ០៥នាក់ដែលត្រូវបានចាប់ខ្លួននោះរួមមាន បុរស ០៤នាក់ និងស្ត្រីម្នាក់ ដោយពួកគេមានអាយុចន្លោះពី ៤៧-៦៣ឆ្នាំ។

គួរបញ្ជាក់ថា បើតាមក្រុមហ៊ុនសារព័ត៌មាន Apple Daily នាយករបស់ខ្លួនចំនួន ០៥នាក់ រួមមាននិពន្ធនាយក លោក រីយ៉ាន ឡរ (Ryan Law), នាយកប្រតិបត្តិ លោក ឆឹង គីមហឹង (Cheung Kim-hung), នាយកប្រតិបត្តិការ លោក ចូវ ថាតគួន (Chow Tat-kuen), និពន្ធនាយករង លោកស្រី ចាន់ ពុយម៉ាន (Chan Puiman) និងនិពន្ធនាយកប្រតិបត្តិ លោក ឆឹង ខៃវ៉ៃ (Cheung Chi-wai) ត្រូវបានចាប់ខ្លួនទាំងអស់នៅព្រឹកថ្ងៃព្រហស្បតិ៍នេះ៕

ដកស្រង់ពី៖ Fresh News