សាធារណជនជប៉ុន គាំទ្ររដ្ឋមន្ត្រីវ៉ាក់សាំង COVID-19 ជានាយករដ្ឋមន្ត្រីបន្ទាប់

សេចក្ដីលម្អិត

ជំពូក៖ ព័ត៌មានអន្តរជាតិ

 ការស្ទង់មតិលើកទី ២ បាននិយាយនៅថ្ងៃច័ន្ទទី ៦ ខែកញ្ញាថា អ្នកបោះឆ្នោតជប៉ុន គាំទ្រយ៉ាងខ្លាំងដល់លោក Taro Kono -រដ្ឋមន្ត្រីទទួលបន្ទុកប្រយុទ្ធប្រឆាំងនឹងជំងឺកូវីដ -១៩ ក្លាយជានាយករដ្ឋមន្រ្តីបន្ទាប់ ខណៈបេក្ខជនមានសក្តានុពលជាច្រើនទៀត រៀបចំសេចក្តីប្រកាសថា ពួកគេ នឹងប្រកួតប្រជែងជាមួយថ្នាក់ដឹកនាំគណបក្សកាន់អំណាច។

ការប្រកាសដ៏គួរឱ្យភ្ញាក់ផ្អើលរបស់នាយករដ្ឋមន្រ្តី Yoshihide Suga កាលពីថ្ងៃសុក្រ ដែលថាលោក ចុះចេញពីតំណែង បានធ្វើឱ្យការប្រកួតប្រជែងភាពជាអ្នកដឹកនាំគណបក្សប្រជាធិបតេយ្យសេរីនិយម (LDP) ដែលកំណត់នៅថ្ងៃទី ២៩ ខែកញ្ញា មានភាពច្របូកច្របល់ ដោយមានបេក្ខជនជាច្រើន បានប្រជែងគ្នាដើម្បីតំណែងកំពូល។

សំឡេងភាគច្រើនរបស់ LDP នៅក្នុងសភា ធានាថា អ្នកឈ្នះ នឹងក្លាយជានាយករដ្ឋមន្ត្រី។ យោងតាមការស្ទង់មតិប្រចាំថ្ងៃរបស់ Yomiuri Shimbun daily អ្នកឆ្លើយសំណួរ ២៣ ភាគរយ បាននិយាយថា លោក Kono រដ្ឋមន្ត្រីទទួលបន្ទុកវ៉ាក់សាំង គឺជាមនុស្សដែលស័ក្តិសមបំផុត ក្នុងការទទួលយក ដោយបន្ទរការស្ទង់មតិកាលពីថ្ងៃអាទិត្យ ដែលមាន ៣១.៩ ភាគរយ ពេញ ចិត្ត លោក Kono។

ជាអតីតរដ្ឋមន្រ្តីក្រសួងការបរទេស និងការពារជាតិម្នាក់ លោក Kono អាយុ ៥៨ ឆ្នាំ បានសិក្សានៅសាកលវិទ្យាល័យ Georgetown និងជាអ្នកនិយាយភាសាអង់គ្លេសស្ទាត់ជំនាញ បានបង្កើតការពេញនិយមក្នុងចំណោមអ្នកបោះឆ្នោតវ័យក្មេង ដែលសកម្មនឹងវត្តមានប្រព័ន្ធផ្សព្វផ្សាយសង្គមពីរភាសា និងមានអ្នកគាំទ្រ ២,៣ លាននាក់នៅលើទំព័រភាសាជប៉ុនរបស់លោកតែមួយ។

លោក Kono គឺជាបេក្ខជន ដែលត្រូវបានគេពេញចិត្តជានាយករដ្ឋមន្រ្តីជាយូរមកហើយ និងមិនបានលាក់បាំងអំពីការចង់បានការងារនេះទេ ប៉ុន្តែព្រឹទ្ធាចារ្យរបស់គណបក្ស បានប្រយ័ត្នចំពោះលោកលើការនិយាយមិនចេះលាក់លៀម និងកេរ្តិ៍ឈ្មោះរបស់លោកថា ជាមនុស្សងកឆន្ទ។

អ្នកផ្សេងទៀត មានអារម្មណ៍ថា លោក នៅក្មេងពេកសម្រាប់ការងារនេះ។ ទោះយ៉ាងណាកាលពីចុងសប្តាហ៍ បណ្តាញទូរទស្សន៍មួយ បានរាយការណ៍ថា លោក Kono ទទួលបានការគាំទ្រពីលោក Suga ។ប្រព័ន្ធផ្សព្វផ្សាយជប៉ុន បានរាយការណ៍ថា លោក Shinzo Abe នឹងគាំទ្រអតីតរដ្ឋមន្រ្តីក្រសួងមហាផ្ទៃ Sanae Takaichi ដែលសង្ឃឹមថា នឹងក្លាយជានាយករដ្ឋមន្ត្រីស្ត្រីដំបូងរបស់ជប៉ុន។

លោក Abe បានលាឈប់ពីតំណែងនាយករដ្ឋមន្រ្តីកាលពីឆ្នាំមុន ដោយសារបញ្ហាសុខភាពប៉ុន្តែនៅតែរក្សាឥទ្ធិពលនៅក្នុងបក្សធំបំផុតទាំងពីររបស់គណបក្ស និងក្នុងចំណោមសមាជិកសភាអភិរក្សនិយម នេះបើតាមការផ្សាយរបស់ CNA/Reuters នៅព្រឹកថ្ងៃចន្ទនេះ។