អ៊ីតាលី នឹងធ្វើជាម្ចាស់ផ្ទះកិច្ចប្រជុំកំពូលអាហ្វហ្គានីស្ថាន G20

សេចក្ដីលម្អិត

ជំពូក៖ ព័ត៌មានអន្តរជាតិ

 នាយករដ្ឋមន្រ្តីអ៊ីតាលី Mario Draghi នឹងធ្វើជាម្ចាស់ផ្ទះកិច្ចប្រជុំកំពូលពិសេសមួយ នៃក្រុមប្រទេសសេដ្ឋកិច្ចធំៗ ចំនួន ២០ នៅថ្ងៃអង្គារទី ១២ ខែតុលានេះ ដើម្បីពិភាក្សាអំពីប្រទេសអាហ្វហ្គានីស្ថាន ខណៈដែលក្តីព្រួយបារម្ភ កាន់តែកើនឡើងអំពីគ្រោះមហន្តរាយមនុស្សធម៌ដែលកំពុងកើតមានឡើង បន្ទាប់ពីក្រុមតាលីបង់ វិលត្រឡប់មកកាន់អំណាចវិញ។

ចាប់តាំងពីក្រុមតាលីបង់ បានកាន់កាប់អាហ្វហ្គានីស្ថាននៅថ្ងៃទី ១៥ ខែសីហាមក ប្រទេសនេះបានតស៊ូជាមួយគ្រោះរាំងស្ងួត និងភាពក្រីក្រយ៉ាងធ្ងន់ធ្ងរ បន្ទាប់ពីសង្គ្រាមជាច្រើនទសវត្សរ៍មកហើយ ហើយសេដ្ឋកិច្ចរបស់ខ្លួនទាំងអស់ ត្រូវបានមើលឃើញថា ដួលរលំ និងសម្បូរកំណើន នៃជនភៀសខ្លួន។ សន្និសីទវីដេអូ ដែលនឹងចាប់ផ្តើមនៅម៉ោង ១ រសៀល-ម៉ោងក្នុងស្រុក នឹងផ្តោតលើតម្រូវការជំនួយ ការព្រួយបារម្ភអំពីសន្តិសុខ និងវិធីធានាឱ្យមានច្រកសុវត្ថិភាពទៅក្រៅប្រទេស សម្រាប់ជនជាតិអាហ្វហ្គានីស្ថាន ដែលជាសម្ព័ន្ធមិត្តលោកខាងលិចរាប់ពាន់នាក់ នៅជាប់នៅក្នុងប្រទេស។

អគ្គលេខាធិការអង្គការសហប្រជាជាតិ លោក Antonio Guterres គ្រោងនឹងចូលរួមកិច្ចប្រជុំនេះ ដោយគូសបញ្ជាក់ពីតួនាទីស្នូល ដែលបានផ្តល់ឱ្យអង្គការសហប្រជាជាតិ ក្នុងការដោះស្រាយវិបត្តិនេះ-មួយផ្នែក ដោយសារប្រទេសជាច្រើន មិនចង់បង្កើតទំនាក់ទំនងដោយផ្ទាល់ជាមួយតាលីបង់។

ប្រទេសអ៊ីតាលី ដែលដូរវេនទទួលតំណែងជាប្រធាន G20 បានធ្វើការយ៉ាងលំបាក ដើម្បីរៀបចំកិច្ចប្រជុំនេះ ដោយប្រឈមមុខនឹងការខ្វែងគំនិតគ្នាយ៉ាងខ្លាំងនៅក្នុងក្រុម ដែលមានភាពខុសគ្នាអំពីរបៀបដោះស្រាយជាមួយអាហ្វហ្គានីស្ថាន បន្ទាប់ពីភាពវឹកវររបស់អាមេរិក ក្នុងការដកទ័ពចេញពីទីក្រុងកាប៊ុល។

ខណៈប្រធានាធិបតីអាមេរិក Joe Biden នាយករដ្ឋមន្រ្តីឥណ្ឌា Narendra Modi និងមេដឹកនាំ G20 នៅអឺរ៉ុប ត្រូវបានគេរំពឹងថា នឹងចូលរួមក្នុងកិច្ចប្រជុំនេះ ប្រព័ន្ធផ្សព្វផ្សាយចិន បានផ្សាយថា ប្រធានាធិបតី Xi Jinping នឹងមិនចូលរួមទេ។

នៅមិនទាន់ច្បាស់ដែរ ថាតើ ប្រធានាធិបតីរុស្ស៊ី Vladimir Putin នឹងចូលរួមដែរឬទេ។ ប្រទេសជិតខាងអាហ្វហ្គានីស្ថាន គឺប៉ាគីស្ថាន និងអ៊ីរ៉ង់ មិនត្រូវបានគេអញ្ជើញឱ្យចូលរួម នោះទេ ប៉ុន្តែ Qatar ដែលបានដើរតួយ៉ាងសំខាន់ ក្នុងនាមជាគូសន្ទនារវាងតាលីបង់ និងលោកខាងលិច នឹងចូលរួមក្នុងកិច្ចពិភាក្សានេះ នេះបើតាមការផ្សាយរបស់ CNA/Reuters នៅថ្ងៃអង្គារ នេះ។