ទីបំផុតអាមេរិក បើកព្រំដែនខ្លួនឡើងវិញ ក្រោយបិទអស់រយះពេល២០ខែ

សេចក្ដីលម្អិត

ជំពូក៖ ព័ត៌មានអន្តរជាតិ

 សហរដ្ឋអាមេរិក បានបើកច្រកព្រំដែនផ្លូវគោក និងផ្លូវអាកាសខ្លួនឡើងវិញ នៅថ្ងៃចន្ទ ទី៨ ខែវិច្ឆិកានេះ ដល់ភ្ញៀវបរទេស ដែលបានចាក់វ៉ាក់សាំងការពារជំងឺកូវីដ-១៩ យ៉ាងពេញលេញ ដោយបញ្ចប់ការដាក់កំហិតរយៈពេល 20 ខែលើការធ្វើដំណើរពីជុំវិញពិភពលោក ដែលបានបំបែកគ្រួសារ រំខានទេសចរណ៍ និងទំនាក់ទំនងការទូតកាន់តែតានតឹង។

ការហាមឃាត់ ដែលដាក់ដោយអតីតប្រធានាធិបតី Donald Trump នៅដើមឆ្នាំ 2020 និងគាំទ្រដោយអ្នកស្នងតំណែងបន្ត គឺលោក Joe Biden ត្រូវបានរិះគន់យ៉ាងទូលំទូលាយ និងក្លាយជានិមិត្តរូបនៃភាពចលាចល ដែលបណ្តាលមកពីជំងឺរាតត្បាត។ ការរឹតបន្តឹងនេះ គឺមិនពេញនិយមជាពិសេសនៅតំបន់អឺរ៉ុប និងប្រទេសជិតខាងរបស់សហរដ្ឋអាមេរិក កាណាដា និងម៉ិកស៊ិក។

ក្នុងកិច្ចខិតខំប្រឹងប្រែងដើម្បីពន្យឺតការរីករាលដាលនៃមេរោគនេះ ព្រំដែនសហរដ្ឋអាមេរិក ត្រូវបានបិទ បន្ទាប់ពីខែមីនាឆ្នាំ 2020 សម្រាប់អ្នកធ្វើដំណើរមកពីផ្នែកជាច្រើននៃពិភពលោក រួមទាំងសហភាពអឺរ៉ុប ចក្រភពអង់គ្លេស និងចិន ឥណ្ឌា និងប្រេស៊ីល។

ភ្ញៀវទេសចរផ្លូវគោកមកពីម៉ិកស៊ិក និងកាណាដា ក៏ត្រូវបានហាមឃាត់។ ការរឹតបន្តឹងជាច្រើនខែ ដែលប៉ះពាល់ដល់មនុស្សរាប់រយលាននាក់ បានជួយបញ្ឆេះ ទាំងទុក្ខវេទនាផ្ទាល់ខ្លួន និងសេដ្ឋកិច្ច ដែលបណ្តាលមកពីជំងឺរាតត្បាត COVID-19។

ទោះបីជាការធ្វើដំណើរពីសហរដ្ឋអាមេរិក ទៅកាន់ទ្វីបអឺរ៉ុប អាចធ្វើទៅបានតាំងពីរដូវក្តៅក៏ដោយ ប៉ុន្តែពលរដ្ឋអាមេរិកជាបរទេស ដែលមានវីសាច្បាស់លាស់ មិនមានការធានាក្នុងការអាចចូលប្រទេសឡើងវិញបានទេ។

ដើម្បីទប់ទល់នឹងតម្រូវការកើនឡើង ក្រុមហ៊ុនអាកាសចរណ៍ បានបង្កើនចំនួនជើងហោះហើរ ឆ្លងទ្វីបអាត្លង់ទិក ហើយគ្រោងនឹងប្រើប្រាស់យន្តហោះធំជាងមុន ខណៈដែលពួកគេចាកចេញពីវិបត្តិជំងឺរាតត្បាត នេះបើតាមការផ្សាយរបស់ CNA/AFP នៅថ្ងៃចន្ទនេះ។