ស្លាប់ពីរនាក់ និង៣៨នាក់ រងរបួស ក្នុងការវាយប្រហារ គ្រាជួបជុំគ្នា ក្នុងទិវាខួបនៃរដ្ឋប្រហារ នៅមីយ៉ាន់ម៉ា

សេចក្ដីលម្អិត

ជំពូក៖ ព័ត៌មានអន្តរជាតិ

មន្ត្រីសន្តិសុខម្នាក់ បានប្រាប់ AFP ថា មនុស្សពីរនាក់ បានស្លាប់ និង 38 នាក់ផ្សេងទៀត បានរងរបួសនៅក្នុងការវាយប្រហារដោយគ្រាប់បែកដៃ លើការប្រមូលផ្តុំគាំទ្ររបបយោធា នៅភាគខាងកើតប្រទេសមីយ៉ាន់ម៉ា កាលពីថ្ងៃអង្គារ (1 ខែកុម្ភៈ) ខណៈដែលការតវ៉ាប្រឆាំងនឹងរដ្ឋប្រហារ ត្រូវបានធ្វើឡើងនៅទូទាំងប្រទេស ក្នុងខួបលើកទី 1 នៃការដណ្តើមអំណាចពីសំណាក់យោធា ។

រហូតមកដល់ពេលនេះ មិនទាន់មានក្រុមណាមួយចេញមុខអះអាងទទួលខុសត្រូវ ចំពោះការវាយប្រហារ ដែលបានកើតឡើងនេះទេ ខណៈដែលសកម្មជនប្រឆាំងរដ្ឋប្រហារ បានប្រារព្ធខួបនៃរដ្ឋប្រហារជាមួយនឹងកូដកម្មស្ងាត់ៗ និងការតវ៉ាដោយទះដែ ដោយបំពានប្រឆាំងនឹងបទបញ្ជារបស់របបយោធា។

ការកាន់កាប់ដោយយោធា ដែលបានបញ្ចប់ការជ្រៀតជ្រែកលទ្ធិប្រជាធិបតេយ្យរយៈពេលខ្លីរបស់ប្រទេសអាស៊ីអាគ្នេយ៍មួយនេះ និងការផ្តួលរំលំមេដឹកនាំស៊ីវិលលោកស្រី Aung San Suu Kyi បានបង្កឱ្យមានការតវ៉ាទ្រង់ទ្រាយធំ និងការបង្ក្រាបលើអ្នកប្រឆាំង។

ដោយតស៊ូទប់ទល់នឹងប្រតិកម្មតបតរ និងការប៉ះទង្គិចគ្នាជារៀងរាល់ថ្ងៃ របបយោធា បានសម្លាប់ជនស៊ីវិលជាង 1,500 នាក់ នេះបើយោងតាមក្រុមឃ្លាំមើលក្នុងតំបន់។ អ្នកឆ្លើយឆ្លងព័ត៌មាន AFP និងអ្នកស្រុក បាននិយាយថា ប្រជាជននៅទូទាំងមជ្ឈមណ្ឌលពាណិជ្ជកម្មទីក្រុង Yangon និងក្នុងទីក្រុង Mandalay បានទះដៃយ៉ាងកក្រើកនៅម៉ោង ៤ រសៀល ជាសញ្ញានៃការបញ្ចប់នៃ "កូដកម្មស្ងាត់ៗ" ប្រឆាំងនឹងរដ្ឋប្រហារ។

ប្រព័ន្ធផ្សព្វផ្សាយក្នុងស្រុកមួយ បានផ្សាយថា មនុស្ស១០នាក់ ត្រូវបានចាប់ខ្លួនពីបទចូលរួមក្នុងការតវ៉ាទះដៃនៅទីក្រុង Yangon ។របបយោធា បានបញ្ជាឱ្យបើកហាងនៅថ្ងៃអង្គារ ប៉ុន្តែផ្លូវនានាក្នុងទីក្រុង Yangon បានចាប់ផ្តើមទទេរស្អាតនៅម៉ោង 10 ព្រឹក ដែលជាទិដ្ឋភាពមួយ បានកើតឡើងដូចគ្នានៅក្នុងទីក្រុង Mandalay និងតំបន់ Tanintharyi ភាគខាងត្បូង។

ការបិទស្រដៀងគ្នានេះ កាលពីខែធ្នូ បានធ្វើឱ្យតាមដងផ្លូវនានានៃទីក្រុង និងទីប្រជុំជននានាទូទាំងប្រទេស ទទេរស្អាត ប៉ុន្តែការបិទកាលពីថ្ងៃអង្គារ ក៏ត្រូវបានសម្គាល់ដោយអំពើហិង្សាប្រឆាំងនឹងរបបយោធាផងដែរ។