EU ងាកទៅរកការហាមប្រាមប្រេងរបស់រុស្ស៊ី ត្រឹមចុងឆ្នាំ

សេចក្ដីលម្អិត

ជំពូក៖ ព័ត៌មានអន្តរជាតិ

 អ្នកការទូត EU ពីររូប បាននិយាយបន្ទាប់ពីកិច្ចពិភាក្សារវាងគណៈកម្មការអឺរ៉ុប និងរដ្ឋជាសមាជិកសហភាពអឺរ៉ុបកាលពីចុងសប្តាហ៍នេះថា សហភាពអឺរ៉ុប កំពុងងាកទៅរកការហាមឃាត់ការនាំចូលប្រេងពីរុស្ស៊ីនៅត្រឹមចុងឆ្នាំនេះ។

សហភាពអឺរ៉ុប កំពុងរៀបចំកញ្ចប់ទណ្ឌកម្មទីប្រាំមួយប្រឆាំងនឹងរុស្សី ជុំវិញការឈ្លានពានអ៊ុយក្រែន កាលពីជាងពីរខែមុន ដែលក្រុងម៉ូស្គូហៅថា ជាប្រតិបត្តិការយោធាពិសេស។ កញ្ចប់នេះ ត្រូវបានរំពឹងថា នឹងកំណត់គោលដៅប្រេងរបស់រុស្ស៊ី ធនាគាររុស្ស៊ី និងបេឡារុស្ស ក៏ដូចជាបុគ្គល និងក្រុមហ៊ុនជាច្រើនទៀត។

រដ្ឋមន្ត្រីថាមពលសហភាពអឺរ៉ុប ក៏គ្រោងនឹងជួបប្រជុំគ្នានៅរដ្ឋធានីបែលហ្ស៊ិក នៅថ្ងៃចន្ទ ដើម្បីពិភាក្សាអំពីបញ្ហានេះ។ អ្នកការទូតសហភាពអឺរ៉ុប បាននិយាយថា ប្រទេសមួយចំនួនរបស់សហភាពអឺរ៉ុប អាចបញ្ចប់ការប្រើប្រាស់ប្រេងរបស់ពួកគេ មុនដំណាច់ឆ្នាំ 2022 ប៉ុន្តែប្រទេសផ្សេងទៀត ជាពិសេសសមាជិកនៅភាគខាងត្បូង មានការព្រួយបារម្ភអំពីផលប៉ះពាល់លើតម្លៃ។

ប្រទេសអាល្លឺម៉ង់ ដែលជាអ្នកទិញប្រេងធំជាងគេមួយរបស់រុស្ស៊ី ហាក់ដូចជាមានឆន្ទៈក្នុងការ កាត់ផ្តាច់នេះនាចុងឆ្នាំ 2022 ប៉ុន្តែបណ្តាប្រទេសផ្សេងទៀត រួមមានអូទ្រីស ហុងគ្រី អ៊ីតាលី និងស្លូវ៉ាគី នៅតែមានការកក់ទុក។

ប្រទេសសហភាពអឺរ៉ុបមួយចំនួន បានស្នើរសុំឱ្យមានការបញ្ចុះតម្លៃលើតម្លៃ ដែលពួកគេសុខចិត្តចំណាយសម្រាប់ប្រេងរុស្ស៊ី។ ទោះជាយ៉ាងណាក៏ដោយ ពួកគេ នៅតែត្រូវបង្ខំឱ្យបង់ថ្លៃខ្ពស់សម្រាប់ការផ្គត់ផ្គង់ពីកន្លែងផ្សេង នេះបើតាមការផ្សាយរបស់ Reuters កាលពីយប់ថ្ងៃអាទិត្យ។