ទាហានរុស្ស៊ី ត្រូវជាប់គុកមួយជីវិតក្នុងការកាត់ទោសឧក្រិដ្ឋកម្មសង្គ្រាមលើកដំបូងនៃសង្រ្គាមអ៊ុយក្រែន

សេចក្ដីលម្អិត

ជំពូក៖ ព័ត៌មានអន្តរជាតិ

 តុលាការអ៊ុយក្រែន បានកាត់ទោសទាហានរុស្ស៊ីម្នាក់ ឱ្យជាប់គុកអស់មួយជីវិត កាលពីថ្ងៃចន្ទ (២៣ ឧសភា) ពីបទសម្លាប់ជនស៊ីវិល ដែលគ្មានអាវុធ នៅក្នុងការកាត់ទោសឧក្រិដ្ឋកម្មសង្គ្រាមលើកដំបូង ដែលកើតចេញពីការឈ្លានពានរបស់រុស្ស៊ី។

Vadim Shishimarin ជាមេបញ្ជាការរថក្រោះ អាយុ 21 ឆ្នាំ បានសារភាពថា មានកំហុសក្នុងការសម្លាប់ឈ្មោះ Oleksandr Shelipov អាយុ 62 ឆ្នាំនៅក្នុងភូមិ Chupakhivka ភាគឦសាននៃប្រទេសអ៊ុយក្រែន កាលពីថ្ងៃទី 28 ខែកុម្ភៈ ពោលគឺរយះពេល 4 ថ្ងៃ បន្ទាប់ពីការលុកលុយ។

Shishimarin ពាក់អាវរងាមានគ្របក្បាលពណ៌ខៀវ និងប្រផេះ បានមើលកិច្ចដំណើរការនីតិវិធីដោយស្ងៀមស្ងាត់ពីប្រអប់កញ្ចក់ការពារនៅក្នុងបន្ទប់សវនាការ ហើយមិនមានអារម្មណ៍រំជើបរំជួល នៅពេលសាលក្រម ត្រូវបានអាន។

សវនាការ ដែលបានចាប់ផ្តើមកាលពីសប្តាហ៍មុន មានសារៈសំខាន់ជានិមិត្តរូបយ៉ាងធំសម្រាប់ប្រទេសអ៊ុយក្រែន ហើយមេធាវីអន្តរជាតិ បានប្រាប់ Reuters ថា វាអាចជាការលើកដំបូងក្នុងចំណោមមនុស្សជាច្រើនរូប។

ទីក្រុង Kyiv បានចោទប្រកាន់រុស្ស៊ីពីអំពើឃោរឃៅ និងសាហាវប្រឆាំងនឹងជនស៊ីវិល ក្នុងអំឡុងពេលការលុកលុយ ហើយបាននិយាយថា ខ្លួន បានកំណត់អត្តសញ្ញាណឧក្រិដ្ឋកម្មសង្គ្រាម ដែលអាចកើតមានជាង 10,000ករណី ។ រុស្ស៊ី បានបដិសេធការកំណត់គោលដៅជនស៊ីវិល ឬការជាប់ពាក់ព័ន្ធក្នុងឧក្រិដ្ឋកម្មសង្រ្គាម ខណៈដែលខ្លួន អនុវត្តអ្វីដែលខ្លួនហៅថាជា "ប្រតិបត្តិការយោធាពិសេស" នៅក្នុងប្រទេសអ៊ុយក្រែន។

វិមានក្រឹមឡាំង មិនបានធ្វើអត្ថាធិប្បាយភ្លាមៗលើសាលក្រមនេះទេ ហើយធ្លាប់បាននិយាយថាខ្លួន មិនមានព័ត៌មានអំពីការកាត់ក្តី ហើយថា អវត្តមាននៃបេសកកម្មការទូតនៅអ៊ុយក្រែន បានរឹតត្បិតសមត្ថភាពរបស់ខ្លួន ក្នុងការផ្តល់ជំនួយ នេះបើតាមការផ្សាយរបស់ Reuters កាលពីយប់ថ្ងៃចន្ទ។