ចៅប្រុសរបស់មេដឹកនាំឯករាជ្យឥណ្ឌា លោក មហាត្មៈ គន្ធី បានធ្លាក់ចេញពីការប្រជែងតំណែងជាប្រធានាធិបតី បន្ទាប់ពីឈ្មោះរបស់លោក ត្រូវបានស្នើឡើងដោយសម្ព័ន្ធភាពនៃគណបក្សប្រឆាំង។
លោក Gopalkrishna Gandhi អាយុ 77 ឆ្នាំ ជាអ្នកការទូតម្នាក់ ដែលប្រែក្លាយទៅជាអ្នកនយោបាយ បាននិយាយថា លោក បានបដិសេធសំណើរបស់សម្ព័ន្ធភាព 17 គណបក្ស ដើម្បីក្លាយជាបេក្ខភាពរបស់ពួកគេ សម្រាប់តួនាទីពិធីដ៏ធំ។
សមាជិកសភាជាតិ និងរដ្ឋ គ្រោងនឹងបោះឆ្នោតជ្រើសរើសប្រធានាធិបតីថ្មី នៅថ្ងៃទី១៨ ខែកក្កដា។ ប្រមុខរដ្ឋឥណ្ឌា ទទួលបានអំណាចតាមរដ្ឋធម្មនុញ្ញមួយចំនួន ប៉ុន្តែភាគច្រើនធ្វើសកម្មភាពតាមការណែនាំរបស់រដ្ឋាភិបាល ដែលធ្វើឱ្យតំណែងនេះ មានតែនាមកាន់តែច្រើនជាងមុន។
លោក Gandhi ដែលជាអភិបាលរដ្ឋ West Bengal ចន្លោះឆ្នាំ 2004 និង 2009 បន្ទាប់ពីត្រូវបានតែងតាំងដោយគណបក្ស Congress ដែលកាន់អំណាចនៅពេលនោះ បានឈរឈ្មោះប្រជែងតំណែងជាអនុប្រធានាធិបតី នៅឆ្នាំ 2017 ប៉ុន្តែបានចាញ់បេក្ខជនគណបក្ស BJP របស់លោកនាយករដ្ឋមន្រ្តីបច្ចុប្បន្ន Narendra Modi ។
លោក Gandhi គឺជាមនុស្សទីបី ដែលបដិសេធការផ្តល់ជូនដោយគណបក្សប្រឆាំង ដើម្បីធ្វើជាបេក្ខជនរបស់ពួកគេ។
សូមបញ្ជាក់ផងដែរថា ត្រកូល Gandhi នៃអតីតនាយករដ្ឋមន្ត្រី ដែលត្រូវបានធ្វើឃាត Indira និង Rajiv Gandhi និង ឥស្សរជនប្រឆាំងនាពេលបច្ចុប្បន្ន Rahul Gandhi គឺកើតចេញពីនាយករដ្ឋមន្ត្រីទីមួយរបស់ឥណ្ឌា Jawaharlal Nehru ហើយមិនមែនមកពី Mahatma Gandhi ទេ នេះបើតាមការផ្សាយរបស់ AFP កាលពីយប់ថ្ងៃអង្គារ។